DILI, STLTIMORLESTE.com – Jurista Timor oan konsidera katak, inan sira neebe hasoru Violensia Domestika iha familia uma laran labele nonok deit, maibe tenke hato’o keixa.
“Hau hanoin tenke barani hato’o keixa, se ita nonok deit iha futuru aktu violensia bele sai grave liu tan, tanba nee atu halo redusaun mak bainhira hasoru violensia hato’o kedan keixa hodi halo prevensaun iha futuru,” dehan Jurista Jose Maria Guterres ba STL iha Kaikoli, Segunda (20/07/2026).
Nia hatutan, ohin loron krime violensia domestika nia numeru kontinua rejista aas, hatudu katak iha ema barak sente ona katak, aktu violensia lei bandu atu halo, tanba nee bainhira hasoru krime sira barani hato’o kedan keixa.
Nia sublina, se inan sira neebe hasoru Violensia Domestika nonok deit, la barani hato’o keixa, ida nee sai mos hanesan difikuldade boot ida, tanba autor neebe pratika krime se bele kontinua pratika aktu nee iha futuru, tanba nee halo kedan prevensaun atu labele grave iha fututu.
Nia fundamenta, iha ema balu seidauk iha konhesimentu diak konaba lei Violensia Domestika, ho ida nee presiza mos halo sosializasaun konaba lei Violensia Domestika nian too ba iha baze, atu nunee ema iha ona konhesimentu konaba lei neebe iha, sira mos tauk atu pratika krime refere.
Iha sorin seluk, Akademiku UNTL, Rafael de Jesus dehan, lei Violensia Domestika iha atu regula ema neebe halo krime, tanba nee hatoo keixa bainhira hasoru violensia iha familia.
“Hau hanoin labele tauk atu hato’o keixa, iha lei atu regula ema neebe pratika aktu ida nee, tanba se iha ona desizaun husi Tribunal sira mos tauk atu pratika tan aktu nee,” dehan nia.
Nia afirma, prosesu kuandu lao ba oin, Tribunal sempre hatun desizaun, tanba nee desizaun Tribunal nian hatudu katak, eduka ema atu labele halo tan aktu refere.
Antes nee Juiza Administrador Tribunal Oecusse, Evangelinho Belo deklara, iha Tribunal Oecusse prosesu neebe numeru aas, kontinua ho krime kontra bandu no mos Violensia Domestika.
(ter)
