DILI, STLTIMORLESTE.com – Governador Banco Central Timor Leste (BCTL), Helder Lopes hatete, dezempenhu ba Fundu Minarai iha tinan 2025 nia rohan sae ba US$ 18.6 Bilhoens kompara ho tinan 2024 US$ 18.2 bilhoens.
Governador BCTL, Helder Lopes hatoo lia hirak nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta nee (27/03/2026).
Governador BCTL hatete, ohin mai relata dezempenhu fundu minarai neebe iha tinan 2025 rohan sae ba US$ 18.6 bilhoens ba Prezidente Republika, Jose Horta.
“Kestaun terseiru neebe ami koalia mos ho sua exelensia mak sobre ita nia dezempenhu fundu minarai, por enkuantu too rohan 2025 ita nia fundus sae ba US$ 18.6 bilhoens kompara ho US$ 18.2 bilhoens iha 2024 sae nee tanba total returnu neebe ita hetan iha 2025 hamutuk US$ 1.77 bilhoens no governu dada deit US$ 1.45 bilhoens, nunee halo ita nia fundu balansu sae,” dehan Governador.
Governador hatete, dala barak rona hanoin husi ema rai laran nomos husi instituisaun internasional neebe mai fo preokupasaun sira nee pertinente maibe haree ba balansu fundu minarai tinan 5 ikus BCTL hametin kualidsade despeza hodi suporta dezempenhu ekonomiku.
“Husi nee hau hakarak hatete katak ita nia preokupasaun ba prinsipiu fiskal neebe dala barak ita rona tantu husi rai laran nomos husi instituisaun internasional sira neebe mai fo preokupasaun ida nee mai ita preokupasaun nee pertinente maibe haree ba ita nia balansu fundu minarai iha tinan 5 ikus nee ami banco central ninia hanoin ita bele preokupa ho prinsipiu fiskal maibe ita nia foku nee diak liu ba ida oinsa hametin kualidade despeza hodi suporta ita nia dezempenho ekonomiko,” nia informa.
Governador hatete, BCTL ssei hametin kualidade despeza hodi suporta dezempenho ekonomiko Tanba Balansu nee mantein iha nivel neebe hanesan tanba returnu neebe diak.
Ida nee fo mensajen ba publiku liu liu setor privado ba investor sira katak lalika uza presifisiu Fiskal hanesan bareira boot ida ba desizaun atu halo investimentu iha rai laran tanba estadu iha rezerva neebe sufisiente hodi asegura sustentablidade de fiskal nomos establidade makro ekonomika iha rai laran.
(eme)
