DILI, STLTIMORLESTE.com – Hospital Nasionál Guido Valadares (HNGV) husu aimoruk item 122 ba INFPM, maibé entidade ne’e responde deit item tolu to’o 5 Outubru.
Komisaun F Parlamentu Nasional halo fiskalizasaun ba INFPM, hodi haree diretamente situasaun stok, sosa no distribuisaun aimoruk ba fasilidade saúde.
Prezidente Komisaun F, Maria Gorumali Bareto, dehan fiskalizasaun ne’e atu haree jestaun INFPM kona ba fornecimentu aimoruk ba HNGV no munisípiu sira.
Nia hateten orsamentu INFPM ba 2026, iha IX Governu Konstitusional, hamutuk US$17 miliaun, maibé falta aimoruk sei kontinua akontese.
“Situasaun ne’e triste tebes. HNGV husu item 122, maibé INFPM responde deit item tolu,” dehan Maria Gorumali Bareto ba Jornalista sira ihá Kampung Alor, Kuarta (07/10/2026).
Nia dehan, durante tinan walu nudar deputada no Prezidente Komisaun F, foin agora mak hasoru diretamente situasaun hanesan ne’e.
Maria hateten, uza mekanismu emerjénsia no fonte única ba sosa aimoruk la sufisiente atu rezolve problema stok iha tempu naruk.
“Bainhira jestor diak, jestaun lao diak; maibé jestor la diak, jestaun mós lao sabraut,” dehan nia.
Nunee mos Membru Komisaun F, Deputada Nurima Alkatiri dehan, falta aimoruk sai problema boot ba pasiente sira, liu-liu iha ospitál.
Nia hateten, Komisaun F hetan lista pedidu husi HNGV ba INFPM ho total item 122, maibé entidade ne’e responde deit item tolu.
Nurima husu Diretor Ezekutivu INFPM atu esplika razaun falta aimoruk no Ministériu Saúde atu justifika falha fornecimentu.
Nia subliña, orsamentu INFPM ba 2026 boot, maibé falta aimoruk sei akontese nafatin iha fasilidade saúde, inklui HNGV.
Komisaun F sei kontinua halo fiskalizasaun no husu entidade relevante sira atu asegura fornecimentu aimoruk ba sistema saúde.
(dom)
