DILI, STLTIMORLESTE.com – Hospital Nasional Guido Valadares (HNGV) rekonese overload pasiente akontese tanba multi-faktór, inklui kama limitadu, transferénsia aumenta, kresimentu populasaun no falta rekursu.
Diretur Servisu Apoiu Diagnóstiku no Terapêutiku HNGV, Vidal de Jesus Lopes, hatete katak sobrekarga pasiente iha HNGV la’ós tanba jestaun hospital nian la diak, maibé kontribui husi faktór oioin.
Nia esplika, númeru kama iha HNGV nia estrutura atual estabelese ona liu tinan 15, no to’o agora seidauk iha mudansa signifikativu.
“Primeriu faktór mak númeru kama iha ospitál ne’ebé liu tinan 15 ona seidauk iha mudansa signifikativu,” dehan Vidal ba jornalista iha HNGV, kuarta-feira (30/09/2026).
Nia hatete katak, iha ona konstrusaun andar pediatria foun, maibé fasilidade ne’e seidauk bele uza tanba problema instalasaun no ekipamentu tékniku.
Faktór seluk mak númeru transferénsia husi ospitál regionál no ospitál referál sira ba HNGV ne’ebé aumenta, hamutuk ho kresimentu populasaun no aumentu númeru pasiente.
Vidal hatete katak, fasilidade saúde iha munisípiu sira balun refere pasiente ba HNGV tanba falta aimoruk, ekipamentu diagnóstiku no konsumível.
Tuir nia, HNGV tuir prinsipiu tenke atende pasiente ho kondisaun grave ka kritiku ne’ebé fasilidade saúde sira seluk labele atende. Maibé, iha realidade, kazu leve mos refere ba HNGV.
“Sira refere mai tanba sistema suporta iha fasilidade saúde sira seidauk máximu. Dala ruma refere mai tanba aimoruk no diagnóstiku laiha, maibé kazu sira-ne’e bele atende iha ne’ebá,” dehan nia.
Nia subliña katak, HNGV mos iha limitasaun no la iha kapasidade atu rezolve problema saúde hotu-hotu iha Timor-Leste.
Atu hamenus overload, Vidal propoin atu kazu ne’ebé la kumpre kritériu transferénsia atende uluk iha ospitál referál ka sentru saúde. Pasiente ho kondisaun grave no kumpre kritériu transferénsia mak tenke refere ba HNGV.
Nia hatete katak, bainhira pasiente tama ona HNGV, hospital labele simplesmente haruka fila, maibé tenke fó atendimentu tuir nesesidade pasiente.
Vidal mos husu diretores saúde iha munisípiu sira atu alerta no buka solusaun ba problema transferénsia, tanba overload la bele sai responsabilidade HNGV deit.
“Rezolve overload iha HNGV presiza reforma integradu. Forsa hotu tenke tau hamutuk no instituisaun autónoma tenke fó apoiu tomak,” dehan nia.
Nia fó ezemplu katak, aprovizionamentu medikamentu, konsumível no ekipamentu tenke asegura iha fasilidade saúde sira, atu profisionál saúde bele atende pasiente no hamenus transferénsia ba HNGV.
Aleinde ne’e, konstrusaun no utilizasaun fasilidade foun konsidera importante atu aumenta kapasidade atendimentu no hamenus sobrekarga.
Vidal mos alerta katak, tempu dengue besik ona, tanba ne’e preparasaun tenke halo sedu. Iha tinan kotuk, HNGV uza Hospital Lahane no fatin iha Tasi Tolu atu responde ba aumentu pasiente.
Nia hatete, númeru pasiente transferidu ba HNGV dinamiku, tanba iha loron balun aumenta no loron seluk tun, depende ba kondisaun no nesesidade atendimentu.
(dom)
