DILI, STLTIMORLESTE.com – Hospital Nasional Guido Valadares (HNGV) sei publika rezultadu final selesaun aplikante 8.084 ba vagas 478, Kinta ka Sesta-feira ne’e.
Diretór Servisu Apoiu Diagnóstiku no Terapêutiku HNGV, Vidal de Jesus Lopes hatete, katak prosesu selesaun dokumentus tama ona faze final, depois hala’o durante loron 10.
“Husi 8.084 aplikante, estimasaun hatudu liu 3.000 la liu dokumentus, maibé numeru fiksu sei hein rezultadu final,” dehan Vidal iha HNGV Bidau, Tersa-feira (06/10/2026).
Nia esplika katak, kandidatu sira ne’ebé la liu faze dokumentus, barak tanba la submete diploma legalizadu orijinal husi ensinu superior tuir rekezitu.
Problema seluk inklui kartaun profisionál ne’ebé expiradu, sertifikadu konduta la iha asinatura, no dokumentus profisionál balun la submete.
Vidal hatete katak, prosesu seleksaun kompostu husi faze eliminatóriu tolu, mak verifikasaun dokumentus, teste eskrita no entrevista ba kandidatu sira ne’ebé liu.
Nia dehan, teste eskrita sei hala’o depois hetan númeru final kandidatu ne’ebé liu faze dokumentus no determina disponibilidade espasu.
“Teste sei ajusta tuir númeru kandidatu, disponibilidade espasu no kapasidade sistema eletróniku Komisaun Funsaun Públika,” dehan nia.
Nia hatutan katak, tuir kalendáriu, teste eskrita bele komesa iha loron 26, maibé data no durasaun depende ba númeru kandidatu final.
Vidal garante katak Komisaun Funsaun Públika sei kontinua asegura transparénsia iha kada faze, hodi prosesu seleksaun hala’o tuir prosedimentu.
(dom)
