DILI, STLTIMORLESTE.com – Prezidente Repúblika (PR), José Ramos-Horta hatete, Primeiru-Ministru Kay Rala Xanana Gusmão mak iha kompeténsia atu esplika problema aimoruk laiha iha sentru saúde.
Prezidente Horta hato’o deklarasaun ne’e ba jornalista sira iha Aeroportu Internasionál Nicolau Lobato, Komoro, Kinta (08/10/2026).
Nia hatete, kona-ba preokupasaun públiku relasiona ho aimorok laiha iha ospitál no klínika sira, nia la iha kompeténsia atu fó esplikasaun.
“Aimorok laiha ne’e Primeiru-Ministru mak bele esplika ida ne’e,” dehan Prezidente Repúblika Ramos-Horta.
Prezidente Repúblika mos hatete, nia iha konfiansa tomak ba Governu ne’ebé lidera husi Primeiru-Ministru Xanana Gusmão.
Nia fiar Primeiru-Ministru sei esforsu hodi buka solusaun ba problema relasiona ho estoke no fornese aimorok iha rai laran.
“Hau iha konfiansa 100% ba lideransa Primeiru-Ministru. Hau fiar nia akompaña problema iha rai laran tomak,” dehan Prezidente Horta.
Ramos-Horta hatete, setor saúde nu’udar setor ida ne’ebé todan no kompleksu, tanba envolve servisu no nesesidade públika ne’ebé boot.
Nia hatete, problema aimorok no servisu saúde presiza koordinasaun di’ak entre instituisaun relevante sira hodi asegura nesesidade komunidade.
Prezidente Horta hatete, nia sei rona uluk Primeiru-Ministru kona-ba situasaun ne’e, antes fó komentáriu tan kona-ba problema aimorok.
“Servisu ministériu rua ne’e todan tebes no komplikadu. Ne’e duni, hau sei rona lai Primeiru-Ministru,” dehan Prezidente Repúblika.
(eme)
