DILI, STLTIMORLESTE.com – Prezidente Repúblika (PR), José Ramos-Horta hato’o apresiasaun ba Vietname nia apoiu konsistente ba Timor-Leste nia adezaun ba ASEAN.
Prezidente Ramos-Horta hato’o apresiasaun ne’e iha Embaixada Vietname iha Aimutin, Dili, Tersa-feira kalan (29/09/2026).
Nia hatete, Timor-Leste no Vietname estabelese formalmente relasaun diplomátika iha 28 Jullu 2002, no amizade kontinua habelar iha área oioin.
Área sira ne’e inklui polítika, ekonomia, edukasaun no kultura, ne’ebé sai baze ba dezenvolvimentu relasaun bilateral entre nasaun rua.
“Partikularmente, ha’u hakarak espresa ami-nia apresiasaun ba Vietname nia apoiu konsistente ba Timor-Leste nia adezaun ba ASEAN.” dehan PR Horta.
Nia mós apresia kompromisu Vietname atu ajuda Timor-Leste partisipa efetivamente iha mekanizmu ASEAN no prepara responsabilidade iha futuru.
Ramos-Horta hatete, abertura Embaixada rezidente Vietname nian iha Dili, iha 12 Abril 2026, marka pasu importante seluk iha relasaun bilateral.
Xefe Estadu hatete, komérsiu entre nasaun rua atinje aproximadamente US$18,7 millaun iha 2025, ho maioria komérsiu hosi Vietname ba Timor-Leste.
Vietname nia esportasaun ba Timor-Leste besik US$18 millaun, ho foos reprezenta liu 90% hosi total komérsiu entre nasaun rua.
“Ami apresia Vietname nia papél nu’udar parseiru fiável iha esforsu sira kona-ba seguransa ai-han nian.”
“Ami mós apresia Vietname nia investimentu iha Timor-Leste, partikularmente liuhosi Viettel, Telemor no servisu finansa dijitál Mosan.”
Nia hatete, servisu sira ne’e kontribui ba konetividade, inkluzaun dijitál no asesu boot liu ba servisu finanseiru ba povu Timor-Leste.
Iha edukasaun no kapasitasaun, Prezidente hatete área ne’e sai pilar importante seluk iha relasaun bilateral entre Timor-Leste no Vietname.
Vietname fó bolsa-estudu anuál governu nian ba estudante timoroan, inklui formasaun iha TIC, agrikultura no dezenvolvimentu dijitál. Vizita estudu no interkámbiu tékniku mós kontribui ba dezenvolvimentu.
(eme)
