DILI, STLTIMORLESTE.com – Prezidente Republika (PR), Jose Ramos Horta hatete, jerasaun foun nia papel importante hodi hadomi ambiente no soe lixu iha nia fatin.
Prezidente Republika hatete, jerasaun foun sira iha papel importante tebes atu harii nasaun ida neebe moos, resistente no sustentavel no soe lixu tenke tuir nia fatin labele soe arbiru hodi hafoer ambiente.
Prezidente Republika, hatoo kestaun nee liu husi intervensaun importante ida iha sesaun abertura Marabia PermaYouth Camp 2026, neebe realiza iha Díli. Ho tema “Asaun Lokal ba ba Konservasaun Bee no Rai nian no Hamenus Risku ba Dezastre Natural sira, iha Marabia, Tersa (09/06/2026).
Eventu nee sai hanesan plataforma ida ba Xefe Estadu atu bolu ema hotu-hotu, liu liu juventude no governu, atu adota medida urjente hodi hasoru dezafiu mudansa klimatika, proteje ambiente no promove responsabilidade sivika iha jestaun lixu no residu sira.
“Jerasaun foun sira iha papel importante tebes atu harii nasaun ida neebe moos, resistente no sustentavel,” dehan Prezidente Republika.
Xefe Estadu preokupasaun ba pratika kontinua atu soe lixu deit iha dalan publiku, tasi-ibun no fatin publiku seluk, no sublina katak estudante no juventude sira, tanba iha asesu boot liu ba informasaun no teknolojia dijital, tenke sai ezemplu diak ba mudansa atitude no konsiensia ambiental.
Xefe Estadu mos defende atu autoridade kompetente sira halao asaun neebe makaas liu atu kombate poluisaun no proteje espasu publiku sira. Iha kontestu nee, Prezidente sujere instalasaun sistema videovijilansia iha area sira neebe vulneravel no implementasaun rigorosa ba sansaun hasoru ema ka entidade komersial sira neebe soe lixu ilegalmente, tanba responsabilizasaun efetiva importante atu promove kultura respeitu ba ambiente.
Tuir objetivu sira husi PermaYouth Camp, Prezidente mos alerta Governu kona-ba nesesidade atu aumenta preparasaun nasaun nian hasoru impaktu mudansa klimatika.
Prezidente enfatiza importansia atu prepara planu kontinjensia neebe forte hodi reduz impaktu husi tempu maran naruk neebe liga ho fenomenu el nino no la nina, neebe kontinua afeta setor agrikultura, disponibilidade bee no seguransa alimentar nasional.
Iha area infraestrutura, Ramos-Horta husu ba Ministeriu Obras Publikas atu aselera rehabilitasaun estrada sira neebe dadaun iha kondisaun aat tebes.
Prezidente hateten katak situasaun nee bele ameasa seguransa povu nian no impede dezenvolvimentu ekonomiku komunidade sira. Atu ilustra difikuldade neebe ema sira hasoru bainhira uza dalan balun, Prezidente deskreve estrada ida hanesan estrada ba purgatoriu, tanba nia kondisaun neebe grave no perigozu.
Iha intervensaun final, Xefe Estadu husu partisipante sira atu hamutuk reza ba Padre João Felgueiras, iha okaziaun aniversariu ba dala-105. Prezidente Ramos-Horta destaka kontribuisaun importante neebe sacerdote nee halo ba Timor-Leste durante dekada barak liu husi servisu no dedikasaun ba povu timor, no marka data importante ida-nee ho sentimentu gratidaun no respeitu boot.
(eme)
