DILI, STLTIMORLESTE.com – Prezidente Republika (PR), Jose Ramos Horta hatete, nia la komentariu konaba Ministeriu Publiku (MP) konstitui arguidu nain haat (4) ba kazu jet privadu neebe utiliza Prezidente Republika nia naran, maibe Prezidente husu se mak temi Prezidente nia naran tenke esklarese sai.
Prezidente Republika Jose Ramos Horta ba jornalista iha Palasiu Prezidensial Nicolau Lobato, Bairo Pite, Segunda (10/08/2026) hatete, konaba Ministeriu Publiku konstitui ona arguidu nain 4 ba kazu jet privadu neebe utiliza naran Prezidente Republika nian iha dokumentu hodi autoriza aterra iha Aeroportu Internasional Prezidente Nicolau Lobato, iha loron 01 fulan-Julhu tinan 2026, maibe Prezidente husu ema neebe utiliza Prezidente nia naran tenke esklarese.
“Hau la komenta ba ida nee, tenke koalia ho PJR, hau la hatene se mak sira bolu, hau hatene deit mak ida nee, konaba aviaun mai nee hau la bolu aviaun nee mai, hau la hatene ema neebe atu sae aviaun ba liur hau la hatene, agora se mak uza hau nia naran, ema sira nee mak tenke esklarese tanba sa mak uza fali hau nia naran, tanba baibain se hau presiza ema boot ruma husi liur mai presiza sira kontaktu, nee mos laos hau nivel atu autoriza ka la autoriza,” dehan Prezidente Republika.
Prezidente Republika hatete, protular se Primeiru Ministru Singapura ou ema milionariu boot ida mai se Prezidente Republika mak konvida mai nee Xefe Gabinete halo karta formal, laos funsionariu ida ou Prezidente ou MNEK hatete deit husi WA dehan bele husik mai ida nee lafunsiona ho nunee.
Antes nee mos Prezidente Republika sei halo investiga interna ba funsionariu iha Palasiu Prezidensial, daudaun nee halo ona investigasaun ka lae? hatan ba kestaun nee Prezidente Republika hatete, “momentu Prezidente nia funsionariu husu Prezidente konaba aviaun Jet privadu nee katak, aviaun ida mai dehan Prezidente mak husu atu tula konvidadu Prezidente, hakfodak husu no konvidadu nee Prezidente rasik la konhese konvidadu nee no foto nee mos Prezidente la konhese.
“Posse hau hatene karik hau husu sira rasik hatene tiha ona, baibain nee Xefe Kaza Sivil mak trata buat sira nee,” katak PR Horta.
Antes nee mos Prezidente husu parte autoridade seguransa atu halo investigasaun ba ema neebe utiliza Prezidente nia naran, karik daudaun nee Prezidente simu ona rezultadu investigasaun ka lae? hatan ba kestaun nee Prezidente Republika hatete, relatoriu premilinariu halo tiha ona maibe agora PJR halo tanba uza Prezidente nia naran.
Se mak uza Prezidente nia naran nee komete krime ida, nee mak ba Prokurador Jeral Republika nia mandatu no nia responsabilidade, depois sira rasik mak sei esplika.
“Hau rona laos elementu ida husi nee ba Aeroportu hatete deit nia simu instrusaun balun para haree saida afinal buat nee saida mak nee deit laos ke fo autorizasaun nee klarifiksaun husi PJR,” katak PR Horta.
Aleinde nee mosu lamentasaun oituan husi treinador husi Indonézia konaba atribuisaun podiu la tuir kriteria internasional liga ho Dili Internasional Maratona nee oinsa Prezidente nia haree ba ida nee hatan ba kestaun nee Prezidente hatete nia lasimu lamentasaun ka kritika ruma.
“Ba halo juri hodi kontrola buat sira nee husi ema tekniku boot husi Australia, Prezidente rederasaun atletismu ASEAN iha nee nia kontente parabens, hau larona laharee kritika neebe husi sese hau laharee,” katak PR Horta.
Aleinde nee liga ho kazu aviaun Jet Privadu, Ministeriu Publiku (MP) konstitui ona arguidu nain 4 neebe utiliza naran Prezidente Republika nian iha dokumentu hodi autoriza aterra iha Aeroportu Internasional Prezidente Nicolau Lobato, loron 01 fulan Julhu tinan 2026.
(eme)
