DILI, STLTIMORLESTE.com – Prezidente Republika (PR), Jose Ramos Horta hatete, loron trabalhador nuudar testamunha luta ba moris.
Prezidente Republika Jose Ramos Horta hatoo lia hirak nee liu husi nia mensajen ba loron Mundial Trabalhador, Sesta (01/05/2026).
Maluk Sidadaun, Trabalhador Timor Leste sira, ohin, iha Loron Mundial Trabalhador sira nian, fo onra ba nasaun nia forsa.
Husi natar no plantasaun kafe too ita nia hospital sala-de-aula, merkadu no servisu publiku sira, imi-nia liman no fuan mak harii ita-nia rain loron-loron. Loron Trabalhador nuudar testemunha moris ba luta neebe naruk ba dignidade, tratamentu justu, no justisa,” dehan PR Horta.
PR Horta dehan, iha mundu tomak, trabalhador sira hasoru forsa husi konflitu jeopolítiku neebe perturba sistema fornesimentu sira, inflasaun, avansu lalais husi intelijensia artifisial no automatizasaun ameasa empregu balu mesmu tempu kria empregu sira seluk, no krize klimatika.
“Iha Timor Leste, ita la izoladu husi tempestade hirak nee. Bainhira folin ai-han no kombustível mundial sae, família neebe sosa foos iha merkadu maka sente uluk. Bainhira ekonomia global lao neneik, ita-nia joven sira neebe buka sira nia serbisu dahuluk maka hein kleur liu. Bainhira tasi sai makaas liu no udan sai imprevizível liu, ita nia agrikultor no peskador sira maka lori nia todan,” katak PR Horta.
Xefe Estadu hatete, maski nunee Prezidente rekuza atu hanoin deit imajen kona-ba dezesperu. Tanba iha krize nia laran mos iha oportunidade. Atensaun global hanesan ba enerjia renovavel inkluzaun dijital no komersiu justu bele aproveita ba benefísiu nasaun nian. Ema tenke sai ator ativu iha konstrusaun mundu foun ba serbisu nian. Tanba nee Hein katak Loron Trabalhador ida nee sai hanesan apelu ida ba reziliensia no asaun ho vizaun ba futuru.
“Hau husu ba Governu, empregador no parseiru sosial sira atu serbisu hamutuk ho tau matan ba ita-nia realidade nasional no tendensia global sira. Ida nee signifika habelar empregu formal no protesaun sosial ba ema hotu. Ita tenke hametin dialogu sosial liu husi negosiasaun koletiva hodi promove servisu neebe dignu iha servisu fatin. Ita tenke aplika padraun sira seguransa no saude profisional nian maski mosu risku foun sira kona-ba klimatiku no teknolojiku, no asegura kumprimentu rigorozu ba Kodigu Traballu no prinsípiu igualdade remunerasaun ba serbisu neebe hanesan, sein diskriminasaun ho kualker tipu. Liuhusi negosiasaun koletiva neebe forte, ita harii fatin servisu neebe dignidade sai padraun ida no dialogu sosial sai hanesan ponte entre aspirasaun no realidade,” katak Horta.
PR Horta dehan, iha Loron Trabalhadores ida-nee mai lao hamutuk hodi hahu loron foun ho aten-barani, determinasaun no hamutuk nuudar família Timor-oan ida deit.
“Maromak haraik bensaun ba ita nia trabalhador sira, no ita nia rai doben Timor Leste,” hakotu PR Horta.
(eme)
