DILI, STLTIMORLESTE.com – Prezidente Republika (PR), Jose Ramos Horta hatete, saudozu eis PR Francisco Guterres Lu Olo nia legado inspira povu no jerasaun foun sira.
Prezidente Republika Jose Ramos Horta hatoo lia hirak nee ba jornalista sira bainhira remata presta omenajen ba maktoban Saudozu Francisco Guterres Lú-Olo iha nia rezidensia Farol, Tersa kalan (23/06/2026), hodi hatoo sentidu kondolensia ba família no povu Timor Leste neebe lakon lider nasional ida neebe kontribui makaas ba Timor-Leste nia luta ba libertasaun nasional too hetan independensia.
Prezidente Republika hatete, Timor lakon kombatente luta nain 24 anos ida iha nasaun, no saudozu eis Prezidente Republika nia legado fo inspirasaun ba povu tomak ba joven sira, inspirasaun ba FRETILIN kontinua buat neebe Nicolau Lobato rai hela hodi kaer metin dame iha rai laran.
“Ita lakon kombatente ida veteranus 24 anos lakon politiku ida, lakon eroi ida servi estadu, tempu luta armada, politika, lideransa masimu FRETILIN nia iha rai laran depois asembleia konstituante no Prezidente Partidu, Prezidente Parlamentu Nasional, Prezidente Republika nia dalan tranjitoria nee kompletu,” dehan PR Horta.
Xefe Estadu hatete, saudozu Lu Olo nia mate sente lakon boot laos deit ba lideransa FRETILIN, lideransa nasional, maibe lakon boot ba estadu.
“Rai nee nia fo nia eransa fo nia legado fo inspirasaun ba povu tomak ba joven sira, inspirasaun ba FRETILIN kontinua buat neebe Nicolau Lobato sira iha rai laran, ba liur Dr Mari Alkatiri no ba ita hotu para hanoin buat neebe nia kontribui atu kontinua kaer metin rai ida nee iha dame nia laran, iha liberdade demokrasia nia laran, nee mak sira nia sakrifisiu,” katak PR Ramos.
Iha biban nee Prezidente Republika hatete, estadu tenke tau matan ba oan kiak no faluk neebe Saudozu husik hela. “Ita sei haree, primeiru tuir lei neebe eziste, se laiha tenke kria haree lejislasaun neebe fo dignidade fo apoiu ba familia hanesan Prezidente Lu Olo nia, tantu veteranu ida 24 anos dezde iha tinan 1974,” katak Horta.
Xefe Estadu hatete, saudozu Lu Olo durante moris sempre iha relasaun neebe respeitu, no saudozu sempre hasoru malu ho Prezidente, no foin daudaun semana ruma liu ba Prezidente iha Malazia, ba vizita privadu halo lansamentu livru, palestra, Prezidente aproveita tempu ba vizita Saudozu iha Hospital Malazia, hanesan Timor oan ida neebe baixa iha hospital maibe too iha neeba labele koalia ho saudozu tanba iha ona sala ICU, tanba nee Prezidente koalia deit ho espoza husi saudozu Dona Cidalia.
PR Horta hatete, sempre respeita ba saudozu hanesan ema neebe luta ba rai ida nee no ema neebe servi estadu no povu, husi saudozu Lu Olo nia mate sente lakon boot ida ba nasaun.
(eme)
