DILI, STLTIMORLESTE.com – Prezidente Republika (PR), Jose Ramos Horta hatete, eis Prezidente Republika Indonezia ba dala lima, Ibu Megawati Soekarnoputri nia vizita mai Timor Leste (TL) hanesan testamunha ba amizade neebe dura.
Prezidente Republika Jose Ramos Horta hatoo kestaun nee, bainhira simu eis Prezidente Republika Indonezia ba dala lima, Ibu Megawati Soekarnoputri iha Aeroportu Internasional Nicolau Lobato, Comoro, Kuarta nee (08/07/2026).
PR hatete, vizita ida nee hanesan testemunha ida ba amizade neebe dura no lasu istoriku neebe klean entre Timor Leste no Indonezia.
“Ami sente onradu tebes simu Ibu Megawati Soekarnoputri, no ami hein atu reafirma ami nia kompromisu hamutuk ba dame, kooperasaun no futuru prosperu ba ita nia povu sira,” dehan PR Horta.
Aleinde nee, Prezidente Republika Ramos Horta ho Primeiru Ministru Kay Rala Xanana Gusmão, hamutuk ho Vise Primeiru Ministru no Ministru Koordenador ba Asuntu Ekonomiku no Ministru Turizmu no Ambiente, Francisco Kalbuadi Lay, Ministru Negosiu Estranjeiru no Kooperasaun, Bendito dos Santos Freitas, Xefe Kaza Sivil Prezidensia nian, Henriqueta M. da Silva, Embaixador Timor Leste ba Indonezia, Roberto Soares no Enkaregadu Negosiu Embaixada Indonezia nian, Sra. Mardiana Warnares, ohin ofisialmente fo benvindu ba Megawati Soekarnoputri, Prezidente Republika Indonezia ba dala lima, iha ninia vizita loron tolu mai Timor Leste, husi loron 8 too 10 fulan Julhu 2026.
Vizita ida nee marka Ibu Megawati nia vizita daruak. Nia vizita uluk mai Timor Leste iha tinan 2002, ho nia knaar nuudar Prezidente Republika Indonezia, hodi partisipa iha selebrasaun istoriku restaurasaun Independensia Timor Leste nian neebe halao iha Tasi-Tolu, Dili.
Vizita nee realiza hafoin konvite neebe mak hatoo husi Prezidente Republika, Jose Ramos Horta durante sira nia enkontru iha Premiu Zayed ba Fraternidade Umana 2026 iha Abu Dhabi. Konvite nee konfirma iha sira nia enkontru iha Jakarta iha loron 23 fulan Marsu tinan 2026. Vizita ida nee ho objetivu atu hametin liu tan lasu istoriku sira neebe klean no amizade neebe dura entre nasaun rua.
Iha loron 9 fulan-Julhu, Prezidente Ramos Horta sei halao vizita kortezia ida ho Ibu Megawati, tuir fali ho serimonia formál ida durante neebe Prezidente sei konfere ba Ibu Megawati onra nasionál aas liu nasaun nian, Ordem de Timor-Leste. Hafoin serimonia nee, Ibu Megawati sei hatoo Palestra Prinsipál Xavi ida, hodi fahe ninia hanoin ho audiensia Timoroan sira.
Hodi fo onra ba ninia vizita, Prezidente Ramos-Horta sei sai ofrese Almosu Ofisiál ida, tuir fali ho oportunidade ba líder rua nee hodi halo deklarasaun ba imprensa.
Iha loron 10 fulan Julhu, Ibu Megawati sei presta omenajen solene ba eroi sira nasaun nian neebe mate ona, hahu ho serimonia deposição de coroa de flores iha Semiteriu Jardim dos Herois iha Metinaro, tuir fali ho entrega deposição de coroa de flores daruak iha Semiteriu Seroja hodi fo onra ba eroi indoneziu sira neebe mate ona.
“Vizita ida-nee hanesan testemunha ida ba amizade neebe dura no lasu istoriku neebe klean entre Timor-Leste no Indonezia. Ami sente onradu tebes atu simu Ibu Megawati Soekarnoputri, no ami hein atu reafirma ami nia kompromisu hamutuk ba dame, kooperasaun, no futuru prosperu ba ita-nia povu sira,” dehan PR Horta.
Timor Leste no Indonezia partilha relasaun ida neebe uniku no evolui ho baze iha istoria rekonsiliasaun no kolaborasaun ida-neebe orientadu ba futuru.
Dezde Timor Leste nia restaurasaun independensia iha tinan 2002, nasaun rua nee servisu inkansavelmente hodi harii konfiansa, ho interkambiu nivel aas no ligasaun entre povu neebe sai nuudar baze ba envolvimentu bilaterál. Ibu Megawati nia vizita istorika mai Dili ba serimonia restaurasaun independensia kontinua sai sai hanesan símbolu definidor ba transformasaun ida nee.
(eme)
