DILI, STLTIMORLESTE.com — Prezidente Repúblika (PR), José Ramos-Horta simu Vise-Primeiru-Ministru Austrália, Richard Marles, hodi hametin amizade no kooperasaun estratéjika entre Timor-Leste no Austrália.
Enkontru ne’e hala’o iha Palásiu Prezidensiál Nicolau Lobato, Bairru Pité, Dili, kinta-feira (22/10/2026), ho foku ba seguransa, dezenvolvimentu ekonómiku no relasaun bilateral.
Marles hateten katak Timor-Leste importante ba Austrália, tanba relasaun jeográfika, fronteira marítima no istória komún ne’ebé liga nasaun rua.
“Ami haree Timor-Leste nu’udar parseiru estratéjiku ne’ebé fundamentalmente importante ba Austrália,” dehan Marles.
Molok enkontru ho Prezidente Ramos-Horta, Marles asina Enkoadramentu Kooperasaun Defeza (Defense Cooperation Framework) hamutuk ho Primeiru-Ministru Kay Rala Xanana Gusmão, atu hametin kooperasaun iha área defeza.
Austrália mós anunsia pakote apoiu ho valor 62 millaun dolar ba tinan lima, atu haforsa kapasidade Polísia Nasionál Timor-Leste (PNTL).
Pakote ne’e inklui entrega ró patrullamentu marítimu tolu, harii sentru operasaun foun ida iha Dili, no hadi’a kapasidade sibernétika no forénsika dijitál.
Apoiu ne’e iha objetivu atu haforsa kapasidade PNTL nian hodi responde ba ameasa seguransa no kombate krime transnasionál iha rejiaun.
Iha área ekonómika, parte rua diskute mós dezenvolvimentu projetu Greater Sunrise. Akordu tékniku sira kona-ba projetu ne’e besik kompletu no prosesu kontinua ba faza dezenvolvimentu komersiál.
Marles afirma katak Austrália sei kontinua servisu hamutuk ho Timor-Leste, hodi harii futuru komún bazeia ba amizade, interese mútuu no kooperasaun duradoura.
(eme)
