DILI, STLTIMORLESTE.com – Prezidente Republika (PR), Jose Ramos Horta hatete, saudozu eis Prezidente Republika Francisco Guterres Lu Olo nuudar dirijente estadu no simbolu moris luta ba ukun rasik aan (URA).
Prezidente Republika, Jose Ramos Horta hatoo lia hirak nee liu husi nia diskursu bainhira partisipa serimonia funebre ba saudozu eis Prezidente Republika, Fracisco Guterres Lu Olo, iha Jardim Herois Patria Metinaro, Sesta (26/06/2026).
Prezidente Republika hatete, ohin Estadu Timor Leste ho nia povu ho silensiu no lutu tanba lakon nia ema asuwain diak ida, saudozu Francisco Guterres Lu Olo neebe Nai bolu hikas ona iha nia kadunan Santo
.
“Ohin Timor Leste hamriik ho silensiu iha lutu ba nia oan-mane boot ida nia mate, Francisco Guterres Lu-Olo nuudar dirijente Estadu nian, sidadaun ida neebe ativu, kombatente ba liberdade, lider politiku, simbolu moris luta ba ukun rasik aan,” dehan PR Horta.
Prezidente Republika hatete, saudozu nia naran kesi metin ho faze desiziva sira iha kaminada nian rezistensia armada, lideransa FRETILIN nian, no konstrusaun baze institusional sira Estadu nian.
“Nia kombatente FALINTIL nian, lider politiku rezistensia nian, dirijente FRETILIN nian. Nia nuudar Prezidente Asembleia Konstituinte, Prezidente Parlamentu Nasional, Prezidente Republika. Nia mak laen, aman, belun, kompaneiru luta nian. Nia ema ida ho konviksaun metin, neebe nunka sees aan husi ideal boot liu patria ida neebe livre, soberania no dezenvolvida,” dehan PR Horta.
Prezidente Republika hatete, saudozu eis Prezidente Republika Lu Olo ba Timor-oan barak, nia reprezenta jerasaun neebe fiar bainhira buat hotu parese imposivel. Jerasaun neebe mehi ba pais ida livre, luta ba mehi nee no reziste bainhira esperansa parese lakon.
“Ohin, hodi hanoin hikas nia, ita selebra misaun ida neebe kumpre ona,” dehan Prezidente Republika.
Xefe Estadu hatete, Lu-Olo pertense ba jerasaun Timor nia eroi nasional sira nian, sira neebe hanorin katak liberdade laos prezente ida, maibe konkista ida neebe halo ho kosar-been, sakrifisiu, fakar raan, aten-barani no perseveransa.
Nia sei kontinua sai inspirasaun ba jerasaun foun sira, prova moris katak bele mehi, maibe presiza luta barak, loron no kalan.atu halo mehi nee sai realidade.
“Ohin, ita fo ita-nia omenajen ba nia batalla ikus ho ai-funan no matan-been. No, hanesan Eskritura hanorin ita iha Livru Eclesiastes, rai-rahun fila fali ba rai, hanesan uluk, no espiritu fila fali ba Maromak, neebe fo nia. Atu nia espiritu fila fali, ho dame, ba Kriador, no atu nia memoria hela iha ita nia leet, no iha kalan nakukun no loron sira neebe nakonu ho susar, atu nia sai farol neebe orienta ita ba fatin seguru,” dehan Horta.
“Ba familia enlutada, hau espresa, hodi Estadu nia naran, hau nia solidariedade no respeitu neebe klean liu. Ita-boot sira nia terus Nasaun tomak sente. Ba kompaneiru luta nian tomak no ba povu Timor-oan, hau husik serteza katak ninia memoria sei la haluha,” hakotu.
(eme)
