DILI, STLTIMORLESTE.com – Prezidente Republika (PR) Jose Ramos Horta hatete, tinan 10 ona asumi kargu nu’udar Prezidente Republika maibe nunka hetan konvite atu hola parte ba Konsellu Konsultivu Fundu Petrolíferu (KKFP).
Prezidente Republika Jose Ramos Horta hatoo kestaun nee ba jornalista iha Farol, Dili, Tersa lokraik (21/04/2026).
“Nee hau hanoin lalika, eis Prezidente hotu-hotu automatikamente halo parte, ida hau wainhira tinan 10 kedas eis Prezidente, hau nunka simu konvite atu halo parte Komisaun Fundu Soberanu nian no hau mos la liga, diak liu lalika porque laiha utilidade a não ser Primeiru Ministru ruma neebe kompetente ba area ninian hanesan Dr. Mari Alkatiri entaun bolu nia ga, agora bolu fali hotu-hotu eis Primeiru Ministru, eis Prezidente ba numeru deit lalika, hau hanoin nunee para fasil liutan ba ita, labele hatete ho ida nee halo parte ida nee lae, entaun husu ba ita boot hakarak halo parte ba konsellu nee ka lae, se nia iha interese boot ba problema mina, problema orsamentu, entaun nia halo parte maibe lalika hotu-hotu, hau tinan 10 hau nunka liga liu,” dehan PR Horta.
Maibe Prezidente mos lee iha jornal. lee relatoriu Banku Sentral nian, Prezidente rasik ba Banku Sentral husu ba sira enkontru para esplika fundu petroliferu nee lao oinsa, no seluk tan uluk PR nuudar eis titular sempre enkontru ho Ministeriu Finansas para sira mos esplika ekonomia lao oinsa no seluk-seluk tan. Maibe opinaun husi Prezidente Republika nia nee mantein ka muda, hatan ba kestaun nee Prezidente Republika hatete bele muda tiha maibe husik ba Komisaun F iha rekomendasaun ruma, Prezidente simu deit.
Foin lalais Prezidente no Komisaun D diskute hametin KKFP, enkontru nee foka liu-liu ba proposta terseira alterasaun ba Lei Nú. 2/2017 kona-ba Organizasaun no Funsionamentu Administrasaun Parlamentar. Audiensia nee parte ida hosi prosesu konsultasaun neebe luan hosi Komisaun atu hetan hanoin hosi lideransa Estadu atual no pasadu sira kona-ba reforma lejizlativa neebe fo impaktu ba orgaun fiskalizasaun nasional sira.
Topiku sentral hosi diskusaun nee mak kona-ba futuru KKFP nian, neebe la ativu ona iha tinan hirak ikus nee. Maske Komisaun nee foti hela opsaun sira atu halakon ka halo reforma ba orgaun nee, Prezidente Ramos-Horta defende atu mantein Konsellu nee liu hosi mudansa estratejika iha nia kompozisaun.
Prezidente sujere katak Konsellu nee tenke revitaliza liuhosi rekrutamentu ba espesialista tekniku sira neebe kualifikadu tebes no iha esperiensia barak. Espesialista sira-nee sei halo koordenasaun ho eis-titular sira atu nunee bele fo apoiu neebe forte no la-polítiku, hodi asegura jestaun efktivu ba riku-soin petrolíferu nasaun nian.*
(eme)
