DILI, STLTIMORLESTE.com – Prezidente Republika (PR), Jose Ramos Horta hatete, nasaun Republika Vanuatu nasaun uniku iha país Pasifiku defende soberania Timor-Leste nian iha Nasoins Unidas.
Prezidente Republika Jose Ramos Horta ba jornalista sira, bainhira remata vizita estadu ba Vanuatu fila hikas mai Timor Leste iha Aeroportu Internasional Nicolau Lobato, Komoro, Segunda nee (03/08/2026) hatete, nasaun Republika Vanuatu tempu difisial defende soberania Timor Leste nian iha Nasoins Unidas.
“Uluk antes tempu luta hau ba, Timoroan balun mos ba iha neeba hela iha neeba, Vanuatu pais uniku iha pasifiku, neebe apoiu ita makaas bainhira sira tama ONU iha 1980, hahu iha neeba ho sira nia fundador Primeiru Ministru Walter Lini, tinan sira nia laran sempre kolabora, maibe nuudar Ministru Negosiu Estranjeiru, nuudar Prezidente hau la ba, maun boot Xanana mak ba dala rua,” katak PR Horta.
Prezidente Republika hatete, Nasaun Republika Vanuatu sira kontinua simpatia makaas ho Timor, admira sira hakarak aprende konaba Timor Leste nia jestaun fundu petrolifeiru fundu soberanu.
“Hau hatete sira haruka delegasaun mai ou delegasaun husi nee tantu ita nia mak fahe ho sira ita nia esperensia, no Primeiru Ministru Vanuatu ho Primeiru Ministru Papua Nova Guine sira nain rua sei mai iha nee partisipa iha 28 Novembru, nee konfirmadu, premeiru vez mak iha Timor ita simu Primeiru Ministru nain rua dala ida,” katak PR Horta.
Prezidente Republika hatete, Primeiru Ministru Vanuatu no Primeiru Ministru Papua sei vizita Timor Leste, hodi partisipa Timor Leste nia selebrasaun iha 28 Novembru, ida nee tanba Timor Leste nia relasaun metin ho nasaun rua. No lider nasaun rua mai protokulu buat hotu sei entrega ba Governu mak sei organiza.
Nunee mos Papua Nova Guine atu loke ona embaixada iha Timor Leste, kuandu primeiru Ministru mai iha Novembru sei lori kedas naran embaixador nomeadu mai TL.
“Iha area kolaborasaun hau hanoin koalia ho sira iha area saude, ita iha ona doutor ida iha neeba, doutor matan ema respeita nia, nia servisu diak maibe nia la liu husi Governu, nia ba liu husi programa maluk Timor Grupu Mediku Australia iha Timor,” katak PR Horta.
Prezidente Republika Jose Ramos Horta nia viajen ba Vanuatu, vizita ida nee fo kontinuidade hafoin reuniaun Konselhu Ministru neebe halao foin lalais nee iha loron 22 fulan Julhu, neebe aprova ona akordu entre Republika Demokratika Timor-Leste no Republika Vanuatu konaba Programa Koperasaun teknika ba Dezenvolvimentu.
Vizita nee reafirma parseiria istorika neebe klean, hodi fo onra ba fatin uniku Vanuatu nian iha istoria nuudar estadu illa Pasífiku mesak neebe defende soberania Timor Leste nian iha Nasoins Unidas. Nuudar jestu gratidaun boot ba apoiu neebe metin durante movimentu libertasaun Timor nian.
Durante vizita estadu ba Vanuatu, Prezidente halo diskusaun bilateral nivel aas ho Prezidente, Primeiru Ministru no Prezidente Parlamentu Vanuatu nian hodi avansa programa kooperasaun teknika ba Dezenvolvimentu neebe foin aprova.
Remata iha Vanuatu, Prezidente Republika iha loron 31 Julhu kontinua viajen ba Melbourne hodi komemora Aniversariu ba 50 husi loron neebe refujiadu Timoroan sira too ba dala uluk iha rai-Australia.
(eme)
