DILI, STLTIMORLESTE.com – David da Silva nuudar negosiante kiii ida neebe hahu ninia atividades ho negosiu kiik iha tinan 2018 ho tipu atividade mak faan sigaru, bee aqua no pulsa, too ohin loron konsege sosa ona kareta no motor tanba dedika aan tomak liu husi atividades negosiu, maske kada loron hetan rendimentu oituan maibe konsege lori ksolok ba nia.
“Hau hahu negosiu kiik hanesan nee, hahu iha tinan 2018 too agora, osan sira nee hau rai hamutuk, hau koko halo netik buat diak ruma, agora hau konsege sosa rai, sosa kareta no motor, tanba nee agora hanoin atu halo tan buat seluk iha futuru no osan sira nee balun hau rai no osan inan kontinua uza sosa sasan hodi kontinua halo negosiu,” dehan negosiante David da Silva ba STL iha ninia knaar fatin Kaikoli, Dili, Tersa (14/04/2026).
Nia haktuir tan katak, rendimentu neebe nia hetan kada loron depende husi estudante sira tama kampus, kuandu loron-loron rame bele hetan osan US$ 20 too US$ 30 kada loron ida, sei iha loron feriadu, movimentu seidun barak, rendimentu loron ida bele hetan deit US$ 10 ate tun liu mak US$ 5.
Osan sira nee hau halibur hodi responde nesesidade uma laran, tanba hau nia inan-aman mate hotu ona, entaun osan sira nee hau rai hamutuk no balun hau fo ba hau nia inan hakiak no osan balun hau rai hodi hanoin ba futuru nian.
Iha biban nee, nia apresia tanba hahu halo negosiu, hetan motivasaun husi ninia kolega neebe uluk sira faan hamutuk, agora nia la faan ona sasan iha dalan ibun, nia mak sempre fo hanoin katak sei joven tenke buka rasik.
“Ita sei joven tenke buka rasik oinsa ita bele haree ba ita nia aan ba aban bainrua, no iha tempu neeba kedas hau hanoin hela liafuan motivasaun nee too ohin loron. Dezafiu hau nian mak dala barak ami sosa tiha sasan barak hanesan faan hela depois udan no ita tenki simu deit ona no segundu mak hanesan fatin ida nee ita hatene katak laos fatin fan sasan no karik wali-kota ka ema sira husi munisipiu tun halo grebe, ami nia sasan sira foti hotu, se lae duni ami no karik ema ruma foun mai faan iha dalan ninin, dala ruma halo problema ho ami,” konfesa nia.
Iha sikun seluk, negosiante Francisco do Carmo dehan, nia hahu negosiu iha jardin masakre 2006 ho atividades negosiu mak faan kafe no bee.
“Difikuldade neebe hau hasoru iha nee mak wali-kota mai duni negosiante sira, entaun ami sempre hasoru difikuldade sira hanesan nee, maske nunee hau hetan osan husi negosiu nee, osan nee jere ba nesesidade uma laran entermos osan bemo ninian, fotocopy tanba ita hanesan estudante tenke jere buat sira nee hotu,” dehan nia.
Nia dehan, rendimentu neebe nia hetan, loron ida sei ema sosa sigaru slop ida hotu, bele hetan US$ 5, sosa bee agua kaixa ida ema sosa hotu bele hetan US$ 3, entaun total loron ida bele hetan osan US$ 9.00, loron-loron hanesan nee deit, tanba nee mak vida negosiante ninian ao mesmo tempu hanesan mos vida estudante.
“Hau agora daudaun halao hela hau nia estudu lian Koreia, entaun oinsa atu maneza hau nia tempu, hau marka tiha tempu oras rua dadersan faan sasan no tuku rua ba kursus.
(EST-UNTL 02)
