ERMERA, STLTIMORLESTE.com — Populasaun iha Munisípiu Ermera konsidera Foho Hituria nu’udar fatin importante ida iha istória Timor-Leste. Tanba ne’e, sira husu ba entidade kompetente sira atu hadia no promove fatin ne’e sai nu’udar sitiu istóriku.
Lia hirak ne’e hato’o ba ekipa Jornada ne’ebé vizita fatin ne’e atu haree diretamente kondisaun fatin no rona istória ne’ebé relasiona ho Foho Hituria.
“Hato’o ba ulun boot sira atu tau matan hela mai fatin ida ne’e, atu nune’e promove fatin ida ne’e nu’udar sitiu istóriku úniku iha rejiaun Kuatrus, atu promove fatin ne’e sai istóriku potensial iha Ermera,” dehan Lucas da Conceição Salsinha, ho kódigu Kalohan Moruk, ba jornalista sira iha Foho Hituria, Tersa-feira (22/09/2026).
Nia hatutan katak, iha futuru, nia espera fatin ne’e bele sai fonte reseita sustentável no kontribui ba dezenvolvimentu nasaun.
Nia esplika, sira hato’o ona pedidu ba lider Xanana Gusmão atu hato’o ba Ministériu Obras Públikas, atu bele haree posibilidade atu loke no hadia dalan ba fatin ne’e, hodi bele dezenvolve nu’udar fatin turístiku.
Nia mos espera lider Xanana bele fila mai vizita fatin ne’e, no hatán ba kompromisu ne’ebé, tuir sira nia istória, temi iha fatin ne’e.
Iha fatin hanesan, Herói Vivo Luis António Salsinha, ho kódigu Ai Ramo, dehan Foho Hituria presiza hadia tanba konsidera nu’udar fatin sagradu no iha valor istóriku ba povu.
“Fatin ne’e presiza hadia, tanba fatin ne’e hanesan povu nian, nasaun nian no istória nian.” dehan nia.
Nia hatutan katak, fatin ne’e konsidera nu’udar fatin sagradu tanba, tuir nia deklarasaun, lider Xanana Gusmão iha ona iha fatin ne’e iha períodu luta.
Nia esplika katak iha buat rua ne’ebé importante: primeiru, kona-ba istória; no segundu, kona-ba kultura. Tanba ne’e, sira tenta atu rai nafatin memória istórika iha fatin ne’e.
Sira mos tau osan uitoan-uitoan hamutuk atu halo plaka ida nu’udar parte husi esforsu atu rai memória ne’e.
Nia hatutan, plaka ne’e iha intensaun atu hetan asinatura husi “Avo Nana”, maibé seidauk realiza. Nia dehan títulu iha laran plaka ne’e “Avo” kuriji ona iha Nunutali, no agora plaka ne’e sei rai hela tanba seidauk iha dalan atu hatama no instala iha fatin ne’ebé planeadu. Tanba ne’e, sira sei kontinua esforsu atu kompleta plaka ne’e.
(ter)
