DILI, STLTIMORLESTE.com – Servisu Edukasaun Munisipiu Liquiça, tinan nee identifika ona eskola 63 neebe presiza reabilita no halo konstrusaun foun.
Lia hirak nee hatoo husi Diretor Servisu Edukasaun Munisipiu Liquiça, Julio da Silva ba STL liu husi telefone, Kuarta nee (22/07/2026).
“Ita nian infraestrutura eskola nian nee, foin daudaun ita identifika ona, depois ita halo ona pedidu ba iha Ministériu Edukasaun liu husi Diresaun Infraestrutura hodi haree asuntu ida nee, nee duni ita identifika ona eskola neebe mak aat, eskola neebe mak presiza reabilita deit, nee duni dadus nee ita haruka ona ba iha Ministériu Edukasaun, tanba nee ita nian pedidu hatama ona ba iha ME,” nia dehan.
Diretor SEM Liquiça nee hatutan, SEM Liquiça identifika ona eskola hamutuk 63, nee nivel eskolaridade, husi numeru ida nee balun reabilita no balun halo konstrusaun foun, maibe tanba balun iha rai no balun laiha rai, nee duni iha pedidu nee hakerek hotu ida nee, nee identifika iha tinan ida nee no hatama pedidu nee ba ME iha tinan ida nee.
“Ita nafatin identifika ita nian kondisaun eskola iha area remotas, inklui haree ba iha fasilidade eskola nian, nee duni iha tinan ida nee mak ita identifika ona eskola 63 neebe mak ita presiza reabilita nomos halo konstrusaun foun. Hanesam ita boot sira hatene katak, ita nian eskola iha area remotas nee ho distansia neebe dok malu, laos besik malu,” nia komenta.
Julio akresenta, konaba profesores idade reforma ninia no balun neebe mak daudaun nee ho kondisaun moras, ida nee hau presiza haree ba iha dadus, ho nunee hau bele hatene lo-loos ninia dadus nee hira.
Iha fatin seluk, Diretor Servisu Edukasaun Munisipiu Bobonaro, Miguel Freitas katak, Ministeriu Edukasaun liu husi Servisu Edukasaun Munisipiu Bobonaro, kontinua identifika kondisaun Infraestrutura eskola balun neebe presiza halo konstrusaun foun no reabilitasaun.
“Iha tinan kotuk ami identifika ona ita nian ensinu pre eskolar hamutuk 13, husi numeru nee 8 halo ona konstrusaun foun no 5 reabilitasaun, agora ba tinan ida nee ami nafatin identifika ita nian infraestrutura eskola, atu nunee ita bele hatene lo-loos katak, hira mak tama ba konstrusaun foun no hira ba reabilitasaun ninia,” nia deklara.
Miguel akresenta, tinan ida nee SEM Bobonaro nafatin identifika kondisaun infraestrutura eskola, maibe tanba daudaun nee udan hela, depois mak ami sei halo kontinuasaun, ita nian eskola 13 nee pre eskolar hotu,” nia dehan.
Nia dehan, iha Munisipiu Bobonaro pre eskolar balun sei didin ho bebak no kalen, ida nee hanesan dezafiu ida ba sira, tanba pre eskolar sira nee didin ho bebak, tanba nee balun atu halo konstrusaun foun no ba reabilitasaun ninia.
Nunee mos Superintendente Edukasaun Munisípiu Dili, Cesarina C. Guterres informa, inspetor hirak nee halo knaar liu husi monitorizasaun neebe halao ba atividades hotu neebe lao iha eskola sira, tantu identifika fasilidade, kondisaun eskola, merenda eskolar, prosesu aprendizajen no seluk tan.
“Hau hanoin liu husi monitorizasaun neebe mak durante nee halo iha eskola balun neebe presiza aumenta sala de aula, no balun presiza halo konstrusaun foun ninia, tanba nee balun hahu aumenta sala aprendizajen ba ita nian estudantes sira, ho nunee bele fasilita ita nian estudantes,” nia esplika.
(jac)
