DILI, STLTIMORLESTE.com – Servisu Edukasaun Munisípiu Bobonaro nafatin halo identifikasaun ba kondisaun no fasilidade iha eskola ida-idak, atu hatene nesesidade ne’ebé presiza hetan atensaun.
Diretor Servisu Edukasaun Munisípiu Bobonaru, Miguel Freitas, hato’o informasaun ne’e ba STL liu husi via-telefoni, Sesta (18/09/2026).
“Ita nafatin identifika kondisaun eskola sira ne’ebé seidauk di’ak, tanba balun nia kalen sira aat hotu ona. Nune’e mos ho fasilidade eskola nian, hanesan meza, kadeira, ekipamentu prátika no seluk tan,” dehan Miguel.
Nia dehan, kondisaun eskola sira balun hadia ona, maibé balun sei presiza konstrusaun foun no aumentu sala de aula, atu bele atende nesesidade estudante sira. Identifikasaun nee importante atu Servisu Edukasaun bele halo pedidu ba Ministériu Edukasaun.
“Ita ko’alia kona-ba kondisaun eskola. Ita nia eskola balun sei uza didin ho bebak, ida nee ita presiza hadia, nune’e bele kria kondisaun di’ak no prepara fasilidade, hodi fasilita estudante sira iha prosesu aprendizajen,” nia hatutan.
Miguel subliña katak, alende kondisaun edifísiu eskola, presiza haree mos ekipamentu prátika, livru no fasilidade seluk ne’ebé bele apoia estudante sira iha prosesu ensinu no aprendizajen.
Nia dehan, kondisaun eskola presiza di’ak no fasilidade sira presiza sufisiente, atu bele kria ambiente ne’ebé apropriadu ba estudante sira iha eskola.
(jac)
