DILI, STLTIMORLESTE.com – Igreja Katolika iha Timor Leste (TL) agradese dedikasaun no sakrifisiu husi Saudozu eis Prezidente Republika, Francisco Guterres “Lu-Olo ba povu TL.
Arsebispu Metropolitana Dili, Sua Eminencia Dom Virgílio Cardeal do Carmo da Silva, SDB hateten, hanesan Timor oan no reprezentante igreja sente lakon tebes ho falesimentu eis Prezidente Republika, Francisco Guterres “Lu-Olo”.
Tan nee, povu TL iha obrigatoriu atu hatoo agradesimentu ba saudozu ninia sakrifisiu hahu husi prosesu luta ba ukun rasik aan inklui iha konstrusaun estadu.
“Ohin ami nain tolu lori igreja nia naran mai atu agradese ba ninia sakrfisiu hotu neebe nia halo ba rai ida nee too ukun rasik aan, aumezmu ita ukun rasik aan tiha, knaar hotu neebe nia lori hodi kontinua harii nasaun ida nee,” hatete Arbebispu Metropolitana Dili, Sua Eminencia Dom Virgílio Cardeal do Carmo da Silva ba jornalista sira iha rezidensia Farol, Tersa (23/06/2026).
Nia mos dehan, ohin halo mos orasaun tanba momentu difisil hanesan nee saudozu nia espoza no oan nain haat presiza tebe-tebes ema hotu-hotu nia orasaun nunee bele fo forsa ba sira hodi hasoru situasaun difisil nee.
“Ita nia prezensa iha nee hatoo ita nia solidariedade hodi reza ba sira atu iha momentu susar nia laran sira mos bele forti nafatin hodi hasoru momentu triste ida nee iha sira nia moris,” tenik nia.
Entretantu igreja hili ona Bispu Dioseze Baukau, Dom Leandro Maria Alves hodi prezidi misa requim ba saudozu Francisco Guterres “Lu-Olo” neebe sei realiza iha loron Sesta feira (26/06) iha Igreja Katedral.
Eis Prezidente Republika Francisco Guterres “Lu-Olo” hakotu iis iha loron Domingu Kalan (21/06) iha Hospital Prince Court, iha Kuala Lumpur, Malazia, hafoin halao tratamentu saude intensivu.
(alb)
