DILI, STLTIMORLESTE.com – Igreja bolu atu sai sakramentu Kristu nian, hodi fó sai Maromak nia domin ba humanidade tomak.
Kestaun ne’e hato’o husi Padre Paul Kerans SVD ba STL Segunda (28/09/2026) husi, Reflesaun ne’e bazeia ba Evanjellu tuir São Lucas 9:46-50, ne’ebé ko’alia kona-ba dixípulu sira-nia atitude hasoru ema ne’ebé halo serbisu di’ak.
Padre dehan, iha Evanjellu ne’e, dixípulu sira diskute malu kona-ba sé mak boot liu entre sira. Situasaun ne’e hatudu tentasaun atu buka pozisaun no autoridade.
Maibé Jezús hatudu katak grandeza iha Reino Maromak la’ós kona-ba pozisaun aas, maibé kona-ba humildade no servisu ba ema seluk.
Jezús mós dezafia atitude Tiago no João, ne’ebé hakarak impede ema ida atu uza Jezús nia naran hodi hasoru serbisu ne’ebé sira halo. Jezús hateten ba sira “Ema ne’ebé la kontra imi, nia hamutuk ho imi,” dehan Padre.
Padre Paul dehan, Liafuan Jezús nian konvida dixípulu sira atu loke an no rekoñese serbisu di’ak ne’ebé Maromak bele halo liuhosi ema seluk.
Servisu Maromak nian la’ós sempre limita de’it ba ema ne’ebé tama iha komunidade Igreja ka tuir estrutura relijioza ida.
Maromak bele uza ema oioin atu hato’o domin, solidariedade, ajuda no esperansa ba ema sira ne’ebé presiza.
Tanba ne’e, sarani sira presiza aprende atu haree no rekoñese prezensa Maromak nian iha serbisu di’ak ne’ebé ema seluk halo.
Reflesaun ne’e mós konvida Igreja atu la tau limite ba Maromak nia serbisu, tanba Nia bele servisu iha fatin oioin liuhosi ema barak.
“Igreja hetan bolu atu sai sakramentu Kristu nian iha mundu, hodi sai sinal no instrumentu Maromak nia domin ba humanidade” hatete Padre.
Sakramentu Kristu nian signifika katak, Igreja tenke sai sinal visível ba Maromak nia domin, liuhosi nia vida no nia servisu ba ema hotu.
Igreja la’ós de’it espasu ba ema ne’ebé fiar, maibé mós komunidade ne’ebé hetan bolu atu serve no akompaña humanidade.
Servisu domin nian bele mosu iha Igreja nia laran, maibé Maromak mós bele halo serbisu ho kbiit liuhosi ema sira iha Igreja nia liur.
Ema ne’ebé ajuda ema moras, defende ema vulnerável, promove dame ka fó esperansa ba ema seluk, bele sai instrumentu ba domin Maromak nian. Tanba ne’e, ita la bele hanesan Tiago no João, ne’ebé hakarak limita serbisu Maromak nian ba sirkulu dixípulu sira-nian.
“Ita presiza iha atitude aberta atu haree obra di’ak, no haksolok bainhira ema seluk halo serbisu ne’ebé fó benefísiu ba humanidade,” katak Padre.
Jezús nia mensajen mós importante ba Igreja ohin loron, liuliu bainhira iha diferensa entre komunidade, grupu no maneira ema sira pratika sira-nia fiar.
Diferensa sira ne’e labele sai razaun atu ita rejeita serbisu di’ak, maibé tenke sai oportunidade atu aprende hamutuk no servisu ba ema hotu.
“Ita hotu hetan responsabilidade atu sai sinal Kristu nian liuhosi liafuan, atitude no asaun konkreta iha komunidade no sosiedade,” katak Padre.
Ho nune’e, igreja bele sai instrumentu ne’ebé lori Maromak nia domin, dame no esperansa ba ema sira ne’ebé moris iha situasaun difísil.
Mensajen Evanjellu nian konvida ita atu la kontra ema ne’ebé halo di’ak, maibé hamutuk ho sira promove buat di’ak ba ema hotu.
(eme)
