DILI, STLTIMORLESTE.com – Jurista Timor oan konsidera katak importante duni estabelese sentru juvenil, hodi asegura minoridade sira neebe komete krime.
“Hau hanoin importante duni estabelese sentru juvenil, hodi nunee bele asegura minoridade sira neebe komete krime, se sentru juvenil seidauk estabelese sai mos preokupasaun ema hotu nian,” dehan Jurista Jose Maria Guterres ba STL iha Kaikoli, Kinta nee (09/07/2026).
Tuir Jose, iha kazu balu envolve minoridade, maibe iha ita nia lei hateten ona katak, minoridade sira la iha responsabilidade kriminal, ho ida nee labele tau sira iha prizaun. Tanba nee kria sentru juvenil atu bele asegura minoridade sira.
Nia esplika, bainhira iha ona sentru juvenil bele halo prevensaun ba iha minoridade pratika krime, tanba sira hatene ona katak iha sentru ida atu tau sira hodi regula konaba aktu neebe iha.
Tanba nee hanesan Jurista Timor oan husu atu planu governu nian harii Sentru Juvenil nee tenke harii ona iha tempu badak, atu tau minoridade sira neebe komete krime.
Iha fatin ketak, Jurista Sergio Dias Quintas dehan, harii sentru juvenil tenke halo lezislasaun foun ida define konaba Sentru Juvenil.
“Molok guvernu harii sentru juvenil, governu mak tenki halo uluk lezislasaun espesial ida hodi define konaba ezistensia sentru nee rasik, ho nia karateristika medida sira nee,” dehan Jurista Sergio.
Tuir Sergio, sentru juvenil diferensia ho prizaun, tanba sentru juvenil nee akomula labarik sira neebe ho karakteristika medida edukativa, laos hanesan prizaun ho karateristika medida punitiva.
Nia sublina, sentru juvenil mai ho nia objetivu propriu atu eduka labarik, molok fila hikas hodi reintegra ba familia no sosiedade.
Aleinde nee Ministru Justisa, Sergio Hornai deklara katak, fatin atu harii sentru Juvenil iha Tibar, tanba daudaun nee nia prosesu sei lao hela.
Tuir Ministru, sentru juvenil akumula minoridade neebe pratika krime, atu nunee iha formasaun ketak ba sira hodi sira sai husi fatin refere bele halo transformasaun ba sira nia aktu hodi labele komete tan krime.
(ter)
