DILI, STLTIMORLESTE.com – Instituisaun Kombate HIV-SIDA (INCIDA) halao atividade seminariu Kona-ba Virus HIV-SIDA ba Estudante Medisina Jeral Univesidade Nasional Timor Lorosae (UNTL).
Nia dehan, INCIDA realiza seminariu ba Estudante Medisina Jeral UNTL sira, husi seminariu ida nee koalia kona-ba moras HIV-SIDA neebe problema boot iha area saude nuan.
“HIV-SIDA hanesan problema boot iha area saude nian iha TL, neebe mak daudaun numeru sae tebe-tebes, depois ema sira neebe pozitivu ona ita haree idade joven sira, entaun ita hatete katak joven sira sai risku,” hatete Dosente Permanente Fakuldade Medesina Jeral (UNTL), Acacio de Jesus ba jornalista sira iha ambitu halao seminariu ba Estudante UNTL iha edifisu INCIDA Paintai Kelapa Dili, Segunda (13/04/2026).
Nia tenik, dadus hatudu katak, joven sira sai risku ba moras HIV-SIDA, tanba husi ransu livre no seksu livre, depois balun menus informasaun kona-ba virus HIV nee rasik.
Tanba nee objetivu ba seminariu ida nee atu halo sensibilizaun ba estudante sira hotu, primeiru sira hatene informasaun no iha konhesimentu ba saida mak HIV-SIDA atu nunee bele proteje aan. Ida nee mos sai materia ida ba sira atu nunee sira mos sai promotor, sira bele sai promosaun prevensaun iha idak-idak nia hela fatin liu-liu iha komunidade nia leet.
Iha fatin hanesaan, Prezidente Institusaun Nasional Combate HIV-SIDA (INCIDA), Daniel Marcal deklara, seminariu ida nee fahe informasaun kona-ba HIV-SIDA nia ba estudante UNTL, atu nunee sira bele halo prevensaun ba moras HIV, hodi antiji sira nian objetivu nee saude tenke diak.
“Karik sira bele kona HIV ba mos labele kona-ba SIDA, tanba iha Timor nee ita haree katak ema HIV mak barak, maibe SIDA nee oituan los, tanba nee ita servisu makaas atu hasae ema nia konsiensia, hodi munda atetudi sira neebe risku para labele kona-ba HIV, nomos ita tenke esforsu makaas hamutuk ho media sira fahe informasaun nee para ema haree no lee, para hodi ema ba tes raan nee, tanba barak kona hela HIV la ba tes raan no la hatene status HIV ida nee mak pregozu, tanba ema mate laos HIV, maibe mate tanba SIDA nee,” nia informa.
Nunee mos Estudante UNTL, Veronica Soares agradese tebes ba INCIDA neebe realiza seminariu kona-ba moras HIV-SIDA, ida nee importante tebes ba estudante sira atu halo prevensaun ba moras HIV-SIDA, tanba moras ida nee pregozu tebes ba vida.
“Ita kuandu kona moras HIV-SIDA, nee estudu mos la lao, no inan-aman lakon osan ba ita nia eskola, maibe moras nee kona ita la ba oin, mehi la realiza, tanba nee ita agradeae tebes ba INCIDA,” nia afirma.
(jen)
