DILI, STLTIMORLESTE.com – Institutu Nasional Kombate HIV-SIDA (INCSIDA) fahe informasaun kona-ba virus HIV ba Juventude Igreja Protesntante Timor-Leste (IPTL) atu prevene moras HIV-SIDA nee laos ho orasaun, maibe mos esforsu hodi buka no hakbesik ba saude hodi halo tratamentu ba moras refere.
Nia dehan, preokupa liu ba Juventude Igreja, tanba sira dependente ba orasaun no la iha esforsu, tanba atu prevene moras HIV-SIDA nee laos ho orasaun maibe esforsu hodi buka no hakbesik ba saude hodi halo tratamentu ba moras refere.
“Ba juventude igreja, hau dehan hanesan nee dala ruma juventude igreja sira nee ita preokupa liu, tanba sira dependente ho orasaun maibe sira nia esforsu la iha fali, tanba nee hau dehan hanesan nee, ita atu halo prevensaun ba transmisaun HIV nee laos deit ho orasaun maibe presiza esforsu mos, tanba agora joven barak mak agora afeita ho HIV-SIDA, tanba buat ida nee laos hotu-hotu, balun komprende, balun la komprende, jadi oinsa ita atu prevene HIV labele kona ita,” hatete Presidente INCSIDA, Daniel Marçal ba jornalista sira iha resintu INCSIDA Pantai Kelapa, Dili, Kuarta (15/04/2026).
Nia tenik, igreja mos iha papel hodi kontribui ba dezenvolvimentu nasional, maibe esforsu makaas hodi halo kurativu, laos ho orasaun deit maibe esforsu hodi kontribui ba dezenvolvimentu Nasional no kontribui mos ba igreja.
“Joven sira inklui joven sira mai husi igreja nee sira mos iha papel boot tebes-tebes kontribui ba dezenvolvimentu nasional nee, agora ita atu kontribui ba dezenvolvimentu nasional, ita labele halo orasaun deit, reza deit loron-loron, ita reza halo orasaun maibe ita mos esforsu saida mak ita atu kontribui ba igreja, saida mak ita kontribui ba dezenvolvimentu nee iha parte ida oinsa atu proteje ema igreja nian husi problema HIV-SIDA, tenke buka hatene mos HIV-SIDA nee saida, hasoru halo nusa, prevene halo nusa” nia informa.
Tanba HIV-SIDA la hili ema husi igreja nee hodi tauk, HIV-SIDA la tauk ema neebe halo orasaun makaas, maibe tauk halo orasaun hodi esforsu makaas buka alternativu halo prevensaun ba moras HIV-SIDA
Iha fatin hanesan, Pastor Igreja Evanjelica Presbiteriana Timor-Leste (IEPTL), Carlos Marçal esplika, parte igreja iha regra ida kona-ba biblia hodi hanorin tuir nuudar ema fiar nian, maibe sira neebe ba igreja mak sei menus, nunee parte Governu ho igreja servisu hamutuk hodi luta halo prevensaun ba transmisaun virus HIV-SIDA nee.
“Hau nia hanoin parte igreja nee pozitivu diak los, husi igreja ita hotu hatene ona, ami iha regra ida neebe iha ona ba biblia, biblia hanorin sarani sira oinsa atu moris nuudar ema fiar, maibe igreja limitadu, entaun igreja so hatene deit ba nia ema limitadu ema neebe ba igreja mos hanesan, entaun kona-ba igreja presiza mos hanesan husi Governu parte husi Governu husi Institutu Nasional kona-ba Kombate HIV-SIDA nee para servisu hamutuk lao hamutuk” nia informa.
Tanba nee husu ba joven sira tenke hatene moras HIV-SIDA, tanba moras nee laos transmite husi sexu livre, maibe virus nee hasoru husi maneira oi-oin, tanba nee liu husi informasaun ida nee hodi fo hatene, nunee joven sira iha komprensaun kona-ba moras HIV-SIDA, tanba virus nee hamate ema barak ona, nunee husu joven sira hodi halo prevensaun no hadok husi sexu livre.
(jen)
