DILI, STLTIMORLESTE.com – Institutu Nasional Kombate HIV-SIDA (INCSIDA) halao atividade sensibiliza informasaun virus HIV ba militante Partidu KHUNTO atu halo prevensaun ba moras HIV-SIDA, tanba moras nee perigozu tebes ba ema nia vida.
Konselheiru nee agradese ba Prezidente INSCIDA ho nia ekipa sira neebe halao atividade, persiza ita hotu partisipa atu nunee kuidadu saude neebe diak no labele monu ba moras nee.
“Ba hau primeira vez mai partisipa atividade ida nee, ba hau orgulhu tebe-tebes, tanba sosializasaun sira nee planu ida diak atu proteje joven sira husi moras HIV-SIDA,” hatete Konselheiru Másimu Partidu KHUNTO, José dos Santos Bucar “Naimori” ba jornalista sira iha ambitu sensibilizasaun informasaun kona-ba virus HIV iha resintu INSCIDA Pantai Kelapa Dili, Sesta (17/04/2026).
Nia tenik, Partidu KHUNTO ho nia militante sira prontu atu rona informasaun husi INCSIDA hodi halao prevensaun ba moras HIV-SIDA, tanba HIV-SIDA nee moras ida neebe perigozu ba vida. Tanba nee, Partidu KHUNTO sempre kontribui ba atividade ida nee.
“Tanba nee husu ba Estadu atu kria kondisaun, atu nunee ema hotu-hotu bele hetan informasaun nee depois halo prevensaun, sei lae moras nee hadaet ba ema hotu-hotu, tanba moras nee bele estraga ita nia joven sira, ” nia deklara.
Iha fatin hanesan, Prezidente INCSIDA, Daniel Marçal ohin hamutuk ho Partidu KHUNTO ho nia militante sira atu koalia kona-ba virus HIV-SIDA, tanba Partidu Politiku nee mak fo kontribuisaun diak, tanba joven sira saude diak mak foin servisu ba nasaun ida nee.
“Ami iha nee la haree ba partidu, maibe haree liu ba ema nia saude, tanba nee ita sempre koalia no koalia beibeik kona-ba virus HIV no oinsa joven sira halo prevensaun ba moras HIV-SIDA nee, tanba joven husi militante Partidu KHUNTO liu-liu ba joven iha Timor laran tomak, nasaun sei persiza imi atu dezenvolvimentu ba rai ida nee,” nia deklara.
Nia hatutan, INCSIDA kontinua nafatin fahe informasaun kona-ba virus HIV ba militante partidu sira hotu atu halo sosializasaun ba militante sira, atu bele rona no halo pervensaun ba moras HIV, tanba moras nee hotu-hotu preokupa tebes.
Nunee mos militante husi Partidu KHUNTO, Celestina do Carmo informa, informasaun ida nee importante tebe-tebes ba militante sira atu hatene no komprende liu tan kona-ba virus HIV-SIDA nia hadaet no prevensaun nee oinsa, tanba moras nee Timor Leste preokupa tebes, tanba daudaun nee joven barak involve ba seksu livre no raan livre.
“Mundu agora nee teknolojia, tanba nee ita haree joven sira barak mak involve ba ransu livre no seksu livre, tanba nee informasaun neebe ohin ita rona tenke tau ba kakutak hodi halo prevensaun ba moras nee rasik,” nia afirma.
(jen)
