DILI, STLTIMORLESTE.com — Institutu Nasionál Kombate HIV/SIDA (INCSIDA) planeia hala’o enkontru ho Komisaun HIV Atambua iha fronteira, atu hametin kooperasaun no prevensaun transmisaun HIV.
Prezidente INCSIDA, Daniel Marçal hateten, katak parte rua konkorda ona atu hala’o enkontru hamutuk iha fronteira iha semana oin.
“Ita sei hala’o enkontru fali iha fronteira ho maluk sira husi Atambua, tanba movimentu ema iha área fronteira ne’e boot tebes,” hatete Presidente INCSIDA Daniel Marçal dehan iha Dili, Segunda-feira (12/10/2026).
Nia hatutan katak, depoisde enkontru ne’e, sei hala’o mós atividade komemorativa hamutuk iha fronteira, atu hametin relasaun no kooperasaun entre parte rua.
Enkuantu ne’e, Akadémiku Universidade Nasionál Timor Lorosa’e (UNTL), José Costantino Ximenes, konsidera planu enkontru ne’e nu’udar inisiativa importante ba esforsu prevensaun HIV entre komunidade iha área fronteira.
Maibé, nia rekomenda INCSIDA atu aumenta atividade sosializasaun iha Batugade no área fronteira sira seluk, atu komunidade komprende di’ak liu risku transmisaun HIV no medida prevensaun.
“Kona-ba enkontru ho Komisaun HIV Atambua, hau hanoin planu ne’e di’ak tebes atu hametin relasaun no prevensaun HIV,” José Costantino Ximenes afirma.
Nia enfatiza katak, INCSIDA presiza halo sosializasaun intensiva iha área fronteira, atu ema ne’ebé halo viajen ba nasaun rua bele hetan informasaun kona-ba prevensaun HIV.
Kooperasaun entre instituisaun saúde iha Timor-Leste no Indonézia importante atu hametin edukasaun, partilla informasaun no promove medida prevensaun HIV ba komunidade ne’ebé hela no movimenta iha área fronteira.
(jen)
