DILI, STLTIMORLESTE.com — INCSIDA sensibiliza estudante na’in-300 kona-ba prevensaun HIV, teste ran no importánsia asesu tratamentu sedu.
Atividade sensibilizasaun ne’e hala’o iha edifísiu INCSIDA, Pantai Kelapa, Dili, iha Sesta-feira, 9 Outubru 2026, atu aumenta joven sira-nia koñesimentu kona-ba HIV/SIDA.
Prezidente INCSIDA, Daniel Marçal hatete katak, sensibilizasaun kontinua importante atu hasa’e konsiénsia joven sira-nian kona-ba risku transmisaun HIV.
“Sensibilizasaun kontinua importante atu fó hanoin ba ita-nia joven sira kona-ba risku transmisaun HIV,” hatete Daniel Marçal ba jornalista sira.
Nia esplika katak, ema hotu presiza halo teste HIV atu hatene sira-nia estatutu no foti medida apropriada, inklui buka tratamentu sedu bainhira presiza.
Daniel mós manifesta preokupasaun kona-ba ekipamentu teste HIV ne’ebé menus kompara ho situasaun iha tempu uluk.
Tanba ne’e, nia husu komunidade atu asesu servisu teste HIV iha sentru saúde sira, hodi hatene sira-nia estatutu no hetan tratamentu sedu.
Iha fatin hanesan, Diretór Asosiasaun Esperansa Tane Futuru (AETF), Mauricio Guterres, agradese ba INCSIDA tanba organiza programa sensibilizasaun ba joven sira.
Mauricio hatete, estudante sira, liuliu ne’ebé prepara an atu servisu iha rai liur, presiza aumenta koñesimentu kona-ba prevensaun HIV.
Nia konsidera sensibilizasaun ne’e importante atu estudante sira komprende risku transmisaun HIV no hatene dalan atu proteje sira-nia saúde.
Programa ne’e envolve estudante na’in-300, ne’ebé tuir formasaun iha área lian Inglés, lian Korea, saúde no língua Portugés.
INCSIDA hala’o atividade ne’e nu’udar esforsu atu hasa’e konsiénsia joven sira-nian kona-ba HIV/SIDA, prevensaun, teste no tratamentu.
(jen)
