DILI, STLTIMORLESTE.com – Institutu Nasional Siensia no Teknolojia (INCT) halao asinatura kontratu ba atribuisaun fundus peskiza sientifiku 2025 ho peskizador grupu sia (9).
Haktuir Ministru Ensinu Superior Siensia no Kultural (MESSK), Jose Honorio da Costa Pereira Jeronimo ba jornalista sira iha salaun INCT Balide ,Kinta nee (10/04/2025).
“Ohin INCT halo asinatura ho peskizador sira iha grupu sia, avaliasaun neebe INCT halo, ohin asina kontratu ho sira atu halo peskiza neebe kontribui ba iha dezenvolvimentu. INCT nian papel importante mak nee, halo peskiza, organiza peskiza, tinan-tinan atividades ida nee INCT halo, hanesan ohin iha hau nia diskursu, peskiza sira neebe afeita ba desizaun politika, husu depois de remata peskiza, lori ba aprezenta iha Konselhu Ministru, atu nunee membru Governu sira bele hatene no bele apar ho peskiza neebe INCT halo,” nia afirma.
Nia dehan, montante orsamentu ba atividades peskiza nee hamutuk US$ 35 mil, tanba nee ohin fo hatene ba prezidente INCT, iha aprezentasaun orsamentu bele halo diskusaun iha realizaun orsamentu, atu nunee bele hetan rezultadu neebe diak, maibe rezultadu peskiza nee tenke kontinua no aprezenta mos iha Konselhu Ministru, membru governu no lider politiku sira bele hatene saida mak INCT ninia knaar.
“Durasaun ba peskiza nee bele too fulan tolu, fulan neen no tinan ida, depende ba peskiza neebe sira halo, tanba INCT iha regras ida rigorozu, peskiza nee sira tenke ba terenu, tanba INCT sei tuir nafatin, tanba nee atribuisaun orsamentu peskiza nee mai husi Orsamentu Jeral Estadu, tanba nee tenke gasta tuir regras, peskiza ba setor lubuk ida neebe iha engenharia mos iha,” katak nia.
Iha fatin hanesan, Peskizador Krispin Fernandes hatete, sente onradu no agradese tanba reprezenta ona peskizador sira hodi ba halo peskiza iha area neebe iha. Konsiente katak siensia no teknolojia no area peskiza no inovasaun mak sai hanesan plataforma ba dezenvolvimentu.
Nunee mos Prezidente Konsellu Ezekutivu INCT, José Cornelio Guterres hatete, ohin selebrasaun kontratu ho peskizador neebe liu selesaun nee hamutuk nain 9 neebe atu ba halo peskiza iha area neebe iha ona. Semana oin sira hahu tun ba terrenu no tempu ba sira fulan lima no Setembru sira konklui ona, molok konklui sira mos sei halo uluk aprezentasaun preliminar ida depois mak konklui. Peskizador sira neee husi UNTL, IPB, IOB, Cristal no sentru peskiza sira.
(jac)
