BAUCAU, STLTIMORLESTE.com – Uma hela-fatin hamutuk rua hetan insendiu iha Aldeia Loli-Nuno, Suku Osso-Uala, Postu Administrativu Vemasse, Munisípiu Baucau, ne’ebé rezulta uma ida mutuk total no uma seluk hetan estragus.
Komandante Operasaun Autoridade Protesaun Sivíl Munisípiu Baucau, Francisco Viana Freitas, informa katak insendiu akontese loron 07 Setembru ne’e iha parte meudia, bainhira Xefe Ildefonso de Sousa Belo ho nia membru família sira sai ba hala’o atividade hortikultura no husik uma iha kondisaun mamuk.
“Akontesementu ida-ne’e, na’in sai tiha ba to’os. Entaun ami investiga katak insendiu akontese kauza husi sirkuitu eletrisidade. Sasan iha uma laran laiha ida mak hetan salvasaun,” hateten Francisco ba jornalista sira iha nia knaar-fatin iha Tirilolo, Baucau Vila, Kinta (10/09/2026).
Nia esplika katak, tuir informasaun no investigasaun insendiu ne’e akontese kauza husi sirkuitu eletrisidade, rezulta uma hela-fatin ne’ebé pertense ba vítima Xefe Ildefonso de Sousa Belo mutuk total. Viziñu sira tenta atu salva sasan iha uma laran, maibé la konsege tanba ahi lakan maka’as.
Nia subliña katak, sasan importante sira ne’ebé vítima lakon iha insendiu refere inklui dokumentus família, kartaun eleitoral, sertidaun osan ho montante rihun ida, roupa estudante, kadernu no sasan seluk.
“Sira nia uma ne’e uma kalen hela-fatin, didin ho bebak, entaun mutuk total. Iha uma hela-fatin ida, ahi hada’et no odamatan mos ahi han hotu. Ami foti hotu ona dadus ba apoiu emerjénsia,” Francisco akresenta.
Nia esplika katak, insendiu hahú husi uma ne’ebé pertense ba vítima Xefe Ildefonso de Sousa Belo, rezulta mutuk no depois alastra ba uma viziñu ida. Maibé, komunidade konsege salva uma viziñu ne’e, nune’e estragus ne’ebé akontese iha de’it parte odamatan.
Francisco subliña katak, família rua ne’ebé afetadu rejistu ona iha Autoridade Protesaun Sivíl Munisípiu Baucau no simu ona apoiu emerjénsia kompostu hahán no la’os hahan.
Enkuantu uma ne’ebé pertense ba Xefe Ildefonso de Sousa Belo, kazu refere aprezenta ona ba autoridade nasional no hein hela desizaun kona-ba apoiu material ba rekuperasaun.
“Viziñu ne’ebé ahi han de’it nia odamatan ne’e na’in haat. Ildefonso ho nia membru família na’in lima agora sira hela iha uma ne’ebé ahi han de’it nia odamatan,” Francisco informa.
Komandante Operasaun ne’e relata katak, insendiu refere la rezulta ema kanek ka lakon vida, tanba bainhira insendiu akontese, uma na’in sira laiha iha uma.
Maibé, insendiu ne’e rezulta membru família na’in tolu ne’ebé estudante nivel Ensinu Básiku Primeiru no Segundu Siklu provizoriamente para eskola, tanba roupa eskola no kadernu sira lakon hotu iha insendiu.
Nia komenta katak, estudante na’in tolu ne’ebé agora para eskola Autoridade Protesaun Sivíl liuhusi Servisu Dezastre Naturais Munisípal Baucau, relata ona ba Servisu Munisípal Edukasaun Baucau atu bele responde.
Iha sorin seluk, Xefe Suku Osso-Uala, Francisco da C. Lobo, informa katak insendiu refere rezulta uma mutuk total, nune’e komunidade sira la konsege salva sasan sira iha uma laran.
Maibé, kona-ba informasaun estudante na’in tolu ne’ebé provizoriamente para eskola tanba roupa eskola no kadernu sira lakon iha insendiu, Xefe Suku Osso-Uala hateten katak parte Suku seidauk hetan informasaun ofisiál kona-ba asuntu refere.
“Informasaun kona-ba estudante na’in tolu ne’ebé para eskola, hau foin rona agora. Ita presiza ko’alia ho parte eskola atu haree situasaun. Sira na’in tolu ne’e, parese ida sei iha nivel SD no ida fali bo’ot ona, parese SMU, no bele eskola iha Vemasse ka Baucau Vila. Maibé, hau seidauk rona katak sira para eskola,” hateten Francisco
Liga ba asuntu ne’e, STL seidauk hetan komentáriu husi Diretor Servisu Munisípal Edukasaun Baucau, tanba diretor la iha fatin atu fó komentáriu kona-ba resposta ba estudante na’in tolu ne’ebé afetadu husi insendiu no seidauk hetan konfirmasaun husi vítima sira.
(tom)
