OE-CUSSE, STLTIMORLESTE.com – Inséndiu iha sala Finansas Postu Integradu Sakato Oe-Cusse, relatoriu tama ona ba Komandu Jerál (KomJer) Polísia Nasionál Timor-Leste (PNTL).
Komandante PNTL Oe-Cusse, Superintendente Xefe Polísia Nicolau Francelino da Costa, hatete insídiu akontese iha tuku 18:30, depois simu informasaun hosi Eskuadra Pante Makasar.
“Ita nia relatóriu kona-ba inséndiu ne’e tama ona iha Komandu Jerál PNTL hanesan informasaun kona-ba akontesimentu,” hatete Nicolau, Segunda-feira (05/10/2026).
Nia esplika, PNTL haruka kedas ekipa bombeirus no forsa reserva ba fatin akontesimentu atu kontrola situasaun.
“Ha’u simu informasaun no orienta bombeirus ho ekipa forsa rezerva atu kedas ba fatin akontesimentu,” nia deklara.
Nicolau hatete, ekipa iha fatin akontesimentu halo relatóriu kona-ba kronolojia no situasaun ne’ebé akontese iha sala Finansas.
Tuir nia, rezultadu inisial hatudu katak inséndiu akontese tanba problema iha sikuitu ar-kondisionadu (AC) iha sala Finansas.
Nia hatete, bombeirus konsege responde lalais no kontrola ahi, nune’e impaktu hosi insídiu ne’e kiik.
Membru Unidade Patrulamentu Fronteira (UPF), ne’ebé lakohi temi naran, konfirma inséndiu akontese iha sikuitu AC sala Finansas Postu Integradu Sakato.
“Inséndiu ne’e akontese tanba sikuitu AC la hamutuk diak, maibé bombeirus atende lalais no kontrola ahi,” nia afirma.
Nia hatete, situasaun iha fatin akontesimentu agora dadaun lao diak no laiha estragu boot.
(jen)
