DILI, STLTIMORLESTE.com – Insidente neebe mak akontese iha Triloka Munisipiu Baukau, Komando Polisia Nasional Timor Leste (PNTL), Munisipiu Baukau kaptura suspeitu nain 6 halo prosesu detensaun hodi aprezenta ba Ministeriu Publiku.
Tuir Komandante PNTL Munisipiu Baukau, Superintendente Xefe Polisia, Antonio Maria de Sá katak, insidente neebe akontese iha Baukau iha loron 3 Outubru kalan, rezulta karreta 2 rahun no membru PNTL nain 2 kanek.
Aleinde akontese tiha, Komando orienta kedas seguransa sira iha terenu ba kedas iha fatin akontesimentu, konsege kaptura kedas autor sira neebe mak envolve iha kazu asaltu nee.
“Autor prinsipal rua ita kaptura kedas iha neste momentu ho natureza fragrante de Litu ita aprezenta ba Komando no hatama iha sela durante 72 oras, aleinde nee ita buka tuir mos autor sira seluk neebe mak envolve iha ninia grupu nee ita kaptura hotu total ema nain 6,” dehan Superintendente Xefe Polisia, Antonio ba Jornalista sira, iha Quartel Jeral PNTL, Kaikoli, Dili, Tersa (05/11/2024).
Insidente nee tuir nia, akontese tanba hetan asaltu husi grupu joven balu, wainhira komunidade sira halo viajen husi Kapital Dili atu ba parte Leste nian liu-liu diresaun ba Ostiku nian, entaun iha kalan nee sira asaltu derpente no tuda fatuk mai iha nakukun i sira mos aparese mosu mai iha dalan publiku ho ekipamentus baibain temi arma branka, balu katana, fatuk ho rama ambon.
Maibe grupu nee konsege harahun karreta ida neebe mak konduz husi ofisiais superior ida husi F-FDTL wainhira tula hela nia oan atu halo viajen ba nia fatin hodi selebra loron finadu.
No kazu nee laos pela primeira vez akontese, maibe grupu ida nee nia problema kuaze dala tolu dala haat ona, problema kleur sira baku malu iha Ossu nee mesak uma laran deit no autor prinsipal ho insial M nee, nia uluk halo problema iha Ossu neeba konsege baku malu vitima neebe mak nia baku nee tama ICU too lakon vida, entaun kazu sira neebe mak akontese iha Triloka nee kuaze ho grupu neebe hanesan.
(mar)
