DILI, STLTIMORLESTE.com – Inspektór eskolar sira kontinua halo monitorizasaun ba prosesu ensinu-aprendizajen iha Ensinu Baziku Filial (EBF) Naroman, Munisípiu Dili.
Kordenadora EBF Naroman, Joana Teresa Freitas, hatete ba STL iha nia fatin servisu, Segunda-feira (21/09/2026), katak inspektór eskolar sira mai monitoriza atividades ensinu-aprendizajen iha eskola, dala ruma semana ida dala ida no dala ruma semana rua dala ida.
“Hau hanoin durante nee inspektór eskolar sira mai hela iha ami nia eskola. Sira mai monitoriza prosesu ensinu-aprendizajen, tau atensaun no fó input ba ami katak tenke halo servisu hanesan nee.
Sira nafatin orienta hau nudar kordenadora, no hau hato’o fali orientasaun nee ba hau nia profesór sira,” Joana dehan.
Nia esplika katak, frekuensia monitorizasaun depende mos ba volume servisu inspektór sira nian, tanba sira iha área kontrolu barak no tenke fahe tempu atu monitoriza eskola sira.
Nia dehan, liuhusi monitorizasaun ne’e, eskola simu orientasaun husi inspektór sira kona-ba prosesu ensinu-aprendizajen no atividades eskola nian.
“Inspektór eskolar sira mai monitoriza atividades ne’ebé lao iha ami nia eskola. Ami mos simu orientasaun ruma husi inspektór sira, depois hau hato’o fali orientasaun nee ba profesór sira,” nia dehan.
(jac)
