DILI, STLTIMORLESTE.com – Relasiona ho dezentendimentu entre Komisaun Anti Korupsaun (KAK) no parte Prokurador Jeral Republika (PJR) bele hafraku servisu KAK nian.
Tuir Jurista Sergio Dias Quintas, nee hatudu sinal negativu katak, instituisaun estadu la solidu no la servisu hamutuk hodi kombate krime korupsaun.
“Wainhira instituisaun rua nee la koopera hamutuk bele hafraku KAK nia kompetensia rasik neebe previstu iha artigu 5 numeru 3 husi Lei numeru 8/2009,” dehan Sergio ba STL iha Kaikoli, Kinta (07/05/2026).
Sergio dehan, iha lei nee hateten katak iha materia investigasaun kriminal nian, komisaun mos bele husu ba Ministeriu Publiku atu foti medida kautelar ruma, tuir lezislasaun prosesual penal nian.
Nia esplika, artigu nee klaru, se MP la delega servisu ruma ba KAK em termos kompetensia investigasaun KAK labele halo buat ruma, tanba MP mak titular ba aksaun penal.
“Espera katak instituisaun rua nee bele servisu hamutuk, duke fahe malu, haree interese nasaun, tanba se lae bele loke espasu ba koruptor sira hodi naok povu nia osan,” dehan Sergio.
Nia afirma, karik iha buat ruma naksalak mak akontese buat sira nee, tanba instituisaun estadu hanesan KAK ho Ministeriu Publiku (MP) laiha superioridade, maiba eziste mak interdependesia ba malu hodi kombate krime korupsaun.
Iha fatin ketak, Akademiku UNTL, Rafael de Jesus dehan, KAK no MP tenke servisu hamutuk hodi kombate krime korupsaun.
“Hau hanoin importante duni KAK no MP tenke servisu hamutuk hodi bele kombate krime korupsaun, se la servisu hamutuk mak.susar atu kombate krime korupsaun,” dehan nia.
Nia hatutan, korupsaun aktu ida neebe la diak, tanba nee presiza halo prevensaun, maibe Prokurador no KAK tenke servisu hamutuk.
(ter)
