DILI, STLTIMORLESTE.com – Instituisaun sira neebe rejista iha Komisaun Anti Korupsaun (KAK) hodi ba deklara rikusoin, iha Instituisaun 22 mak la kona koima.
Tuir Diretor Prevensaun KAK, Antonino Alves da Cruz katak, iha Instituisaun 22 mak livre husi koima, konaba deklarasaun rikusoin nian.
“Iha Instituisaun 22 mak la kona koima, total Instituisaun neebe rejistadu iha sistema atus ida rua nulu (120), iha Instituisaun 22 livre husi koima,” dehan nia ba jornalista sira iha Kaikoli, Kinta (20/08/2026).
Nia hatutan, Instituisaun neebe livre husi koima mak hanesan, Autoridade Nasional dos Minerais, IP, Provedoria dos Direitus Humanus no Justisa, Instituto Nasional Dezenvolvimento Maio de Obra, Autoridade Aduaneira, HIV-SIDA, Inspesaun Jeral Estadu, Autoridade Nasional Designada Kombate Alterasaun Klimatika, IP, Instituto Nasional Siensia Teknolojia, Sekretariu Estadu Dezenvolvimentu Lokal, Komisaun Nasional Aprovezionamentu, Instituto Geologia Timor Leste, IP, Instituto Nasional Administrasaun Publika, Murak Rai Timor, Sentru Nasional Rehabilitasaun, Autoridade Nasional Lisensiamentu Ambiental, Sentru Nasional Formasaun Profesional Bekora, IP, Sekretariu Estadu Asuntu Toponomia Organizasaun Urbana, Gavinete Segundu Vice Primeiru Ministru, Servisu Apoiu Sosiedade Sivil, Sekretariadu Parlamentu Nasional, Autoridade Nasional Petrolium, Autoridade Nasional Petroliu no Minerias, instituisaun 22 nee mak iha tinan ida nee sira la kona koima.
Reforsa, iha Instituisaun 98 mak sei kona hela koima, tanba nee deklarante sira KAK aplika ba sira tuir koima neebe iha 25 porsentu, se sira kontinua la selu koima neebe iha, mak KAK kontinua hasae ba koima 30 porsentu.
Iha fatin ketak, Jurista Jose Maria Guterres sehan, instituisaun sira tenke hakruk ba regra neebe iha.
“Hau hanoin instituisaun sira tenke hakruk ba regra neebe iha, liu-liu ba deklarante sira sente iha duni obrigasaun tenke kumpri obrigasaun nee hodi ba deklara rikusoin,” dehan nia.
Hatutan tan, instituisaun sira neebe nia aplikante deklara rikusoin, hatudu ezemplu neebe diak ba iha instituisaun sira seluk atu bele banati tuir.
Aleinde nee, Akademiku Sebastiao Dos Santos dehan, KAK tenke aplika sansaun ba iha instituisaun sira neebe nia deklarante la hakruk ba regra neebe iha.
“Hau hanoin KAK tenke foti sansaun ho rigor ba iha aplikante sira neebe la kumpri regra, atu nunee sira labele pratika tan aktu nee,” dehan nia.
Informa tan, KAK labele husik deklarante sira livre, tenke haruka sira hakruk ba regra neebe iha, tanba lei maka haruka.
(ter)
