DÍLI, STLTIMORLESTE.com — INTERPOL fó formasaun investigasaun arma de fogo ba Polísia Investigasaun Sientífika Kriminál (PSIK), Autoridade Aduaneira, Migrasaun no Polísia Nasional Timor-Leste (PNTL).
Diretór Nasionál PSIK, Vicente Fernandes Brito hatete, informasaun sai elementu importante ba formasaun profisionál no implementasaun lei.
“Informasaun loos no konfiável ajuda Estadu prevene krime, identifika ameasa no foti desizaun apropriadu,” dehan nia,” hatete Diretór Nasionál PSIK, Vicente Fernandes Brito ba jornalista sira iha Salaun Palm Spring, Segunda nee (28/09/2026).
Vicente hatete, sistema informasaun presiza iha kualidade, profisionál, integradu no hetan apoiu husi rekursu umanu ne’ebé kompetente.
Nia hatete, kooperasaun entre instituisaun no organizasaun internasionál hanesan INTERPOL bele hametin troka informasaun.
Kooperasaun ne’e konsidera importante atu hasoru krime transnasionál no aumenta kapasidade investigasaun iha área seguransa.
Nia hatete, investimentu iha teknolojia, formasaun, prosedimentu no kualidade informasaun sai parte importante ba prevensaun kriminalidade.
Ofisiál Espesializadu Programa Arma INTERPOL, Line Haidar, hatete Projetu Steelfish parte husi programa INTERPOL kona-ba arma de fogo.
“Projetu ida-ne’e finansia husi Departamentu Enerjia Estadus Unidus Amerika no promove kooperasaun ho Gabinete INTERPOL iha Dili,” nia sublina.
Nia hatete, formasaun ne’e objetivu atu hadi’a maneira investigasaun kona-ba arma de fogo ne’ebé apreende iha kazu kriminal.
“Arma sira bele liga malu, no investigasaun bele identifika orijen, inklui fonte arma ne’ebé desviadu,” nia tenik.
Nia argumenta, medida ne’e bele ajuda prevene movimentasaun arma ilegál tama ba Timor-Leste no hametin seguransa rejionál.
Formasaun ne’e mós foka atu prevene no responde ba tráfiku arma ilegál ne’ebé liga ho krime internasionál no transnasionál.
Line Haidar hatete, arma de fogo sai elementu komún iha forma krime oioin, tanba ne’e investigasaun presiza kapasidade espesífiku.
Nia hatete, investigasaun presiza buka no taka fonte arma de fogo, inklui fator sira ne’ebé fasilita akontesimentu krime.
Arma ne’ebé apreende iha Timor-Leste ka nasaun seluk bele iha ligasaun ho arma sira seluk ne’ebé movimenta entre nasaun.
Arma hirak-ne’e bele produz iha nasaun seluk, depois movimenta ba nasaun seluk no ikusmai apreende iha fatin krime.
“La iha nasaun ida bele servisu mesak. Ita presiza servisu hamutuk no hametin kooperasaun internasionál,” nia hakotu.
(jen)
