DILI, STLTIMORLESTE.com — Governu halo ona eviksaun no komesa konstrui ona drainajen iha fatin fatin, maibe inundasaun kontinua akontese no seidauk liberta total sidade Dili husi problema inundasaun.
Nee faktus neebe prova iha Tersa (7/4/2026), wainhira akontese udan ho intensidade neebe ladun boot, sidade Dili nakfilak tiha ba lagoa, estrada sira hanesan iha jardin 5 de Maiu be sae to trotoar hodi perturba movimentu transporte publiku.
Iha parte Aimutin nian bee sira tun husi manleu no husi foho lolon sira sulin tun mai liu husi estrada DIT nian borus ba estrada Aimutin, balu sulin fali ba area surikmas, liuhusi estrada, nunee mos bee neebe sulin tun mai estrada boot, balu sulin tun ba aimutin, balu sulin tesin ba hudilaran liu husi estrada.
Estrada Aimutin iha drainajen antigu ida ho medidas luan, iha kapasidade atu akumula bee sira husi manleuana nian, maibe drainajen neebe halo husi manleu nian tun mai DIT laiha ligasaun ho drainajen antigu, nunee kuandu udan boot, bee sira husi foho lolon sira tun mai sidade, balu fakar ba estrada hodi hamosu inundasaun iha area balu hanesan estrada Hudilaran no estrada DIT.
Tuir Miguel Tilman, Aimutin area neebe risku ba inundasaun, kada tinan sempre hasoru inundasaun, maske halo drainajen husi DIT nian tun mai Aimutin, maibe bee sira tun mai husi manleu sae ba estrada hodi hamosu inundasaun boot, tanba drainajen neebe iha labele akomula bee neebe volume boot.
“Bee sira tun mai husi manleu nian boot tebes, tanba nee mak fakar ba estrada, balu tun ba , balu tesik ba hudilaran, balu ba surikmas liu husi estrada, tanba sistema drainajen neebe halo seidauk diak hodi kanaliza bee sira ho volume boot iha tempu udan,” dehan Miguel ba STL iha Aimutin, Kuarta (8/4/2026).
Nia hatete estrada iha parte Aimutin nian kuandu udan boot labele liu, tanba bee liu fali estrada laos liu husi drainajen neebe governu halo. Iha drainajen antigu ida nia medidas boot maibe ladun funsiona, tanba nee bee sulin liu fali husi estrada hodi hamosu inundasaun.
Joven nee husu governu atu foku Hadia drainajen sira iha sidade Dili, liu liu estrada protokulu sira tenke livre husi inundasaun, nunee bele sai hanesan alternativu ba movimentu ransporte publiku iha Dili laran.
“Ita nia governu sobu no hadia, mas diak liu foku mos ba drainajen no estrada sira iha kapital Dili, sidade ninin sira husik lai, foku hadia estrada protokulu sira, se klot halo luan, se kleuk halo los, se kuak baba, se tuan ona tenke troka foun,” sujere Miguel.
(god)
