DILI, STLTIMORLESTE.com – Investor husi Brunei Darussalam hasoru malu ho Prezidente Republika Jose Ramos Horta, hodi koalia kona-ba investimentu neebe mak sei halo iha nasaun nee.
Bainhira remata hasoru malu, Embaixador Timor Leste ba Burnei Barusaslam, Abel Guterres ba jornalista sira iha Palasiu Prezidensial Bairo Pite, Tersa (26/11/2024) hatete, ohin nia hamutuk ho investor sira husi Brunei Darussalam mai hasoru Prezidente Republika hodi koalia kona-ba investimentu neebe sei halo iha Timor Leste, liu-liu iha Munisipiu Baukau.
“Ami mai hasoru malu ho Prezidente Republika, Jose Ramos Horta, atu koalia kona-ba investimentu neebe mai husi liur. Ida nee hanesan investimentu hahu husi rai Brunei, neebe ita hein katak dia 29, sei halo prosesu atu halao investimentu iha TL, sei halao iha Munisípiu Baukau. Sei hahu uluk iha munisipiu ida, la bele hahu iha fatin hotu-hotu, depois lao tiha mak haree atu halo mos iha munisipiu sira seluk,” dehan Embaixador nee.
Embaixador hatete, investor sira sei halo investimentu iha Munisipiu Baukau liu husi hakiak manu.
Nia hatutan, atu halo investimentu kapital tenke iha, no investor sira nee hakarak investe husi buat neebe kiik mak sae ba boot.
Iha biban nee, Prezidente Republika Jose Ramos Horta fo benvindu ba investor sira husi Brunei Darussalam neebe hakarak mai halo investimentu iha TL.
(eme)
