DILI, STLTIMORLESTE.com – Institutu Politeknik Betano (IPB) uza lian tetun no português iha ensinu aprendizajen ba estudante sira.
Liafuan nee hatoo husi Prezidente IPB, Acacio Cardoso Amaral ba jornalista sira iha salaun Ian Martin, Balide, Dili, Kinta nee (20/02/2025).
“Se ministru atu aplika mos ba ensinu superior publiku, ami hein deit, ida nee diak, tanba lingua português nee ita nian lingua ofisial, gosta la gosta ita tenke uza, ita hatene katak, ita Timor nee ita nian lian ofisial mak rua nee, maibe realidade barak mak seidauk domina lingua, daudaun nee ami uza lian tetun ho português ba ensinu aprendizajen ba estudantes sira. Ami nian kolega sira neebe remata iha Brazil no Portugal uza lian português, ami sira seluk neebe laos remata iha Portugal no Brazil ami uza lingua tetun, maibe rua nee lingua ofisial hotu,” nia afirma.
Acacio dehan, sira iha dosentes hamutuk 32, total estudantes tuan nee 430, no estudantes foun foin daudaun mai tinan nee hamutuk 152, depois sira tuir prosesu aprendizajen.
Iha fatin hanesan, Ministru Ensinu Superior Siensia no Kultura (MESSK), Jose Honorio da Costa Pereira Jeronimo apela ba IPB ho UNTL tenke prepara aan ho didiak sira nian profesores sira hanorin estudantes ho lian tetum ho português, atu nunee bele iha kompetisaun neebe mak diak liu ba iha futuru.
(jac)
