DILI, STLTIMORLESTE.com – Jesus fó kbiit no autoridade ba apóstolu sanulu-resin-rua atu haklaken Evanjellu, kura moras no hasoru forsa demóniu.
Lia hirak ne’e hato’o hosi Padre Paul Kerans, SVD ba STL, Kuarta (23/09/2026) liuhosi nia reflexaun ba Evanjellu Lucas 9:1-6, 23 Setembru 2026.
Tuir Pe. Paul, Evanjellu ohin nian deskreve kona-ba enkargu apóstolu sanulu-resin-rua ne’ebé Jesus haruka hala’o misaun.
Jesus fó ba apóstolu sira kbiit no autoridade atu hasoru demóniu hotu no kura moras, hodi sira bele haklaken Evanjellu.
Iha misaun misionária, apóstolu sira tenke tuir Jesus nia instrusaun no konsellu kona-ba viajen no maneira hala’o sira-nia misaun.
Jesus instrui apóstolu sira atu la lori sasán ruma ba viajen, maibé tenke fiar katak Maromak sei fornese sira-nia nesesidade.
Pe. Paul hateten katak, apóstolu sira tenke sai ezemplu moris kona-ba Maromak nia domin no kuidadu ba ema seluk.
“Apóstolu sira tenke hili atu hela iha ema nia uma, haraik bensaun ho Maromak nia dame, no kontente ho saida de’it sira simu.” dehan Padre.
Nia esplika katak apóstolu sira labele buka benefísiu rasik, maibé tenke servisu ho domin, kompaixaun no preokupasaun ba ema sira.
Tuir nia, apóstolu sira tenke fahe la’ós de’it liafuan, ideia ka doutrina, maibé mós sira-nia esperiénsia kona-ba Maromak no Nia Oan-Mane.
Pe. Paul subliña katak ema kristaun hotu simu bolun la’ós de’it atu sai dixípulu, maibé mós atu sai apóstolu iha mundu.
“Ita ida-idak simu bolun la’ós de’it atu sai dixípulu, maibé mós atu sai apóstolu.” Dehan Pe.
Nu’udar apóstolu, ema kristaun tenke fó sasin kona-ba Jesus liuhosi moris, hodi hatudu domin, kompaixaun no preokupasaun ba ema seluk.
Misaun evanjelizasaun nian husu ema kristaun atu lori Maromak nia domin ba sira ne’ebé moris hale’u sira iha komunidade.
Pe. Paul konvida fiar-na’in sira atu moris tuir Jesus nia instrusaun no sai testemuñu Evanjellu liuhosi sira-nia moris loron-loron.
(eme)
