DILI, STLTIMORLESTE.com – Jesus nia knaar mak atu hatudu Maromak nia mizerikórdia ba ema sala na’in sira no lori sira fila ba dalan loos.
Mensajen ne’e hato’o husi Pe. Paul Kerans, SVD, liuhusi refleksaun ba Evanjellu Mateus 9:9-13, ba loron Segunda-feira, 21 Setembru 2026.
Iha Evanjellu ohin nian, Farizeu sira husu pergunta ba Jesus nia dixípulu sira bainhira sira haree Jesus han hamutuk ho kobradór impostu no ema sira ne’ebé konsidera nu’udar sala-na’in. “Tan sá imi-nia Na’i han hamutuk ho kobradór impostu no sala-na’in sira?”
Pergunta ne’e fó oportunidade ba Jesus atu hatudu katak Maromak nia hakarak boot liu mak mizerikórdia, la’ós sakrifísiu de’it.
Jesus temi profeta Oséias nia liafuan: “Ha’u hakarak mizerikórdia, la’ós sakrifísiu.” Nia mós fó komandu: “Bá no aprende saida maka liafuan sira-ne’e signifika.”
Pe. Paul hatete, Jesus nia desizaun atu han hamutuk ho ema sira ne’ebé sociedade konsidera nu’udar sala-na’in, hatudu Maromak nia hakarak atu besik ba ema sira ne’ebé presiza kura espirituál no inklui sira ne’ebé eskluidu.
“Jesus nia knaar mak atu hatudu Maromak nia mizerikórdia ba ema sala-na’in sira, hodi lori Maromak nia prezensa kura nian ba sira ne’ebé presiza espirituál. Presiza hatudu mizerikórdia ba sira ne’ebé eskluidu,” dehan Pe. Paul.
Nia esplika katak, Jesus hakbesik an ba ema hotu atu revela Maromak nia mizerikórdia ne’ebé klean. Maromak nia mizerikórdia laiha kondisaun, no Nia la hein ema atu muda uluk, maibé fó kbiit ba sira atu bele muda sira-nia moris.
Tuir Pe. Paul, Jesus nia dalan moris no nia estilu komuñaun iha meza sai nu’udar resposta ba Maromak nia hakarak atu hatudu mizerikórdia ba ema hotu.
Nune’e, nu’udar Jesus nia dixípulu sira, ema Kristaun mós bolu atu moris ho laran-sadia hanesan Maromak, no sai ajente ba Maromak nia domin no mizerikórdia ne’ebé bele transforma ema nia moris.
“Ita hetan bolu atu transforma ema seluk liuhosi ita-nia dalan moris rasik. Ita hotu tenke sai ajente sira Maromak nia domin no mizerikórdia nian ne’ebé transforma moris sira,” dehan Pe. Paul Kerans, SVD.
(eme)
