DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JIM, tanba pratika krimi rua hasoru lezadu ho inisial TTL.
Iha sala julgamentu laran, Juiz Prosesu Zulmira Auxiladora lee sai akuzasaun katak, iha loron fulan neebe haluha tiha ona, iha tinan 2020 nia laran, haleu tuku 03h30 madrugada, lezadu TTL (Atoku) hamutuk ho nia kolega sira hanesan H, J, ba hemu tua iha bar My Flower Maloa.
Liu tempu balun, arguidu mos tama ba buti kedas lezadu nia kolega H nia kakorok, mak lezadu hodi ain tebe kona arguidu nia kelen. Nunee komesa mosu diskusaun entre sira iha bar laran.
Kolega sira sai husi bar hodi hases aan mak arguidu koalia ameasa hodi dehan ba lezadu katak, o sei kuak no lezadu ho kolega sira sai husi bar hodi hases aan ba tur fali iha Largo Lesidere.
Bainhira sira tur la kleur, arguidu mos ho karreta tuir ba, tun husi karreta kaer ho katana ida iha nia liman lao kedas ba diresaun lezadu nian atu taa lezadu mak lezadu haree hodi halai mak arguidu duni tuir, lezadu monu arguidu taa mak lezadu konsege kaer tiha katana, dudu arguidu monu ba rai, lezadu konsege halai liu, subar hodi haree arguidu.
No arguidu buka lezadu la hetan ona mak arguidu ba buka lezadu iha nia uma iha Bidau hodi katana taa tan odamatan boot (potaun Besi) mak arguidu foin fila. Arguidu kontinua ameasa lezadu liu husi meios media sosial hanesan whatsApp.
Konsekuensia direita husi hahalok arguidu nian, hasai lia fuan o sei kuak, nomos hodi no uza katana atu taa lezadu, halo lezadu tauk, no halo nia labele sai husi uma hodi halo nia atividade loron-loron nian iha liur ho seguru.
Arguidu hatene nanis katak, hasai lia fuan ameasa sira nee no uza sasan kroat hanesan katana nee lei bandu, bele halo lezadu sente tauk, la sai husi uma, arguidu la tahan nia aan, no arguidu halo tuir nia hakarak rasik.
Konsiente no hatene momos katak, hahalok hanesan nee la diak no lei mos bandu, la hanoin atu sees aan husi hahalok nee. Haree ba hahalok sira nee, arguidu nuudar autor material ho forma konsumada ba krimi rua, krimi ameasa tuir artigu 157 husi Kodigu Penal, no krimi Armas Proibidas tuir artigu 211, ho nia alterasaun lei nu. 05/2017.
Hatan ba akuzasaun neebe iha, arguidu deklara katak, faktus neebe iha loos hotu.
Faktus neebe iha loos hotu, arguidu nia relasaun ho lezadu hanesan kolega neebe diak. Arguidu rekonhese faktus sira nee loos hotu, no kona-ba ida krimi ameasa nee sira rezolve ona tuir familia.
Arguidu deklara, katana neebe uza hodi taa no sasan neebe arguidu halo estragus nee hadia hotu ona, arguidu mos arepende tebes ba nia hahalok, promete sei la halo tan aktu nee iha futuru.
Arguidu konfesa imparsial ba faktus, tanba nee Tribunal presinde tiha atu la rona deklarasaun lezadu no sasin. No Tribunal husu ba iha Prokurador no Defeza atu tama ba iha alegasaun.
Iha alegasaun Prokurador Gustavo da Silva deklara, arguidu konfesa integralmente ba faktus sem rezerva, no arguidu hateten konhese lezadu no testemunha hanesan kolega diak. Prokurador haree katak, konfirma ba arguidu kona-ba krimi arma branka arguidu mos konfesa. Haree ba konfesaun arguidu nian, Ministeriu Publiku husu ba iha Tribunal atu kondena arguidu tuir konviksaun Tribunal nian.
Enkuantu iha alegasaun Defeza Jose da Silva deklara katak, arguidu konfesa no arguidu mos deklara sira diak malu ona. Defeza mos haree la iha provas ida hodi justifika kona-ba katana refere, ho nunee defeza husu ba Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Ivan Patrocenio, Zulmira Auxiladora, Arjentino Nunes, Ministeriu Publiku reprezenta husi Prokurador Gustavo da Silva, arguidu hetan asistensia legal husi Defensor Publiku, Jose da Silva.
(ter)
