DÍLI, STLTIMORLESTE.com — Ekipa basketball feto ADR União hetan vitória importante hasoru Aileba ho skor apertadu 43–42, iha kompetisaun Liga Basketball Timor-Leste, ne’ebé hala’o iha Ginásio Dili, Sabadu (19/09/2026).
Partida ne’e hetan animasaun hosi adeptus no apoiantes sira ne’ebé mai suporta ekipa ida-idak. Treinadór hosi ekipa rua mos nafatin fó instrusaun, motivasaun no orientasaun ba jogador sira atu kontinua joga ho disiplinu to’o partida remata.
Husi inísiu jogu, ADR União no Aileba hatudu kompetisaun maka’as, ho ekipa rua tenta kontrola bola no kria oportunidade iha atake. Iha kuartu primeiru, ekipa rua hatudu jogu ekilibradu, maibé ADR União konsege hetan vantagem iha pontu.
Depois deskansa, ekipa rua fila fali ba quadra atu kontinua partida. ADR União no Aileba nafatin disputa posesaun bola no tenta kontrola ritmu jogu. Aileba halo esforsu atu hamenus diferensa pontu liuhusi kontra-atake, maibé ADR União konsege mantein vantagem.
To’o remata primeira metade, ADR União lidera ho skor 20–15 hasoru Aileba.
Iha partida ne’e, jogador hosi ekipa rua mos tenta uza lansaun pontu tolu, maibé realizasaun 3-point shot seidauk konsistente. Maske nune’e, oportunidade hosi lansaun sira seluk ajuda ekipa rua aumenta pontu durante partida.
Depois deskansa durante 10 minutu, ekipa rua fila fali ba quadra atu kontinua parte daruak. Jogu sai nafatin maka’as, ho ADR União no Aileba troka atake no defeza.
Iha kuartu daruak hosi parte daruak, ADR União konsege ezekuta oportunidade sira iha atake ho di’ak liután kompara ho Aileba. Rezultadu iha momentu ne’e hatudu ADR União ho 32 pontu, enkuantu Aileba hetan 28 pontu.
Tama ba minutu sira ikus, Aileba halo esforsu atu rekupera diferensa pontu. Maibé ADR União konsege tahan presáun no kontinua buka oportunidade atu aumenta pontu.
To’o sirene final, ADR União sai vensedór ho skor apertadu 43–42, ka manan ho diferensa pontu ida de’it hasoru Aileba.
Vitória ne’e hatudu kompetisaun maka’as entre ekipa rua, liuliu iha defeza, kontrolu bola no ezekusaun atake. Rezultadu ida ne’e mos aumenta animasaun iha Liga Basquetebol Timor-Leste no kontinua fó espasu ba modalidade basquetebol atu hetan atensaun hosi públiku.
(leo)
