BEIJING, STLTIMORLESTE.com – Durante estadia delegasaun jornalista Timor oan iha Beijing, aprende barak husi media nasional sira iha Xina, nia kontribuisaun kobertura ba Dezenvolvimentu Nasional iha Xina.
Delegasaun jornalista Timor oan neebe aprende iha Beijing Xina hamutuk nain 24 kompostu husi media privadu no estatal, iha neebe sai husi Timor Leste iha loron 14 Julhu no too iha Beijing Xina iha loron 15 Julhu no kontinua kedas partisipa iha seminariu no formasaun aberta iha loron 16 Julhu prezide direita husi Adjuntu Diretor Institutu Estudu Internasional no Formasaun Avansadu China International Communications Group (CICG), Zhu Zhongshu no reprezentante Sekretariu Estadu Komunikasikan Sosial (SEKOMS) Timor-Leste, Augostu Sarmento dos Santos, tuir planu sei termina iha loron 04 fulan Agostu tinan nee.
Durante seminariu semana ida iha Beijing, jornalista Timor oan hetan materia husi oradora prinsipal sira, esplika liu kona-ba tradisaun kultura no istoria ida neebe rejista ona liu tinan 4.000, neebe mak sobrevive, sivilizasaun antigu iha mundu inklui patrimoniu istoriku sira. Kondisaun Nasional mak Xina halo reforma rural, hahu prosesu mekanizasaun agrikola, forsa traballu rural neebe barak liu enkoraja nia agrikultor sira harii fabrika kiik sira neebe absorve no dinamiku.
Palestra tematika prinsipiu prinsipal sira seluk mak, jornalista Timor oan aprende mos asuntu diplomasia Xina nian, harii komunidade Xina ASEAN ida ho futuru neebe fahe esperensia, interasaun sira entre dezenvolvimentu Xina nian no komunikasaun notisia nian, dezenvolvimentu no responsabilidade sosial media Xina nian, pratika Xina nian no komunikasaun internasional kona-ba dezenvolvimentu agrikultura sustentavel, notisia internasional husi media prinsipal Xina nian, Xina nia ajuda estranjeiru no kooperasaun dezenvolvimentu internasional iha era foun, inovasaun no pratika online husi media Xina nian.
Aleinde mos jornalista Timor oan sira halao vizita ofisial ba edifisiu China International Communications Group prezide husi Vise-Diretor CICG Zhu Zhongshu ho nia estrutura iha salaun CICG, fo oportunidade ba jornalista Timor oan sira haree direita dezenvolvimentu istoria, kultura no evolusaun komunikasaun media husi tempu uluk ba era dijital.
“Durante loron hira iha nee, ita aprende buat barak husi matenek nain sira, kona-ba dezenvolvimentu Xina nian neebe kontribuisaun media Xina nian ba prosesu dezenvolvimentu neebe lao iha Xina,” hateten reprezentante delegasaun jornalista Timor Oan nain 24 iha Beijing, João Guterres hafoin remata vizita edifisiu CICG, Tersa (22/07/2026).
Delegasaun jornalista Timor oan iha Beijing, konsidera nasaun Xina nuudar nasaun avasaun iha parte teknolojia, infraestrutura no seluk tan, maibe progresu hirak nee laos esforsu husi parte estadu Xina nian deit, maibe kontribui mos husi media Xina nian.
Reprezenta delegasaun jornalista Timor oan iha Beijing, kondisaun estadia jornalista Timor oan iha Beijing importante tebes, tanba bele hetan esperensia husi media Xina nain hodi kontribui dezenvolvimentu Timor nian liu husi servisu kobertura jornalista nian iha terrenu.
“Ita la dehan ita nia media Timor la diak, durante nee servisu diak ona maibe ida nee parte ida atu kontribui diak liu tan ba dezenvolvimentu iha ita nia rai,” João komenta
Entretantu jornalista Timor oan husi media privadu neebe partisipa iha formasaun nee hamutuk nain 25 husi media Estatal hanesan Agência Noticiaso de Timor Leste (ANTIL) Radio Televizaun Timor Leste, Emprezariu Publiku (RTTL.EP) no media privadu sira hanesan Suara Timor Lorosa’e (STL), TVET, SMNEWS, GMNTV, SAPNEWS, DILI POST, INDEPENDENTE, TIMOR POST no LAFAEK NEWS, neebe hetan akompanhamentu husi media SEKOMS no Assessor SEKOMS.
(tom)
