DILI, STLTIMORLESTE.com – Eis Deputadu Partidu Demokrátiku (PD) no Eis Membru Konsellu Estadu, Virgilio Hornai hatete, Jose Angostinho da Costa Belo nia lideransa halo eleisaun la’o hakmatek no laiha konflitu.
Tuir nia, susesu ne’e tanba Jose Belo konsege hatudu imparsialidade no profesionalizmu, durante períodu hirak tuir malu hodi halo supervizaun eleitorál ne’ebé kredível tebes.
“Ha’u aseita ho Irmãun Jose Belo nia lideransa iha CNE, tanba nia konsege hatudu imparsialidade no profesionalizmu. Tanba ne’e mak eleisaun la’o hakmatek,” dehan Virgilio Hornai ba STL, iha Dili, Kinta ne’e (01/10/2026).
Nia esplika katak, durante períodu eleisaun laiha disputa rezultadu eleisaun ne’ebé grave, hodi lori konflitu polítiku no sosiál ne’ebé grave.
“Durante períodu eleisaun laiha disputa rezultadu eleisaun ne’ebé grave hodi lori konflitu polítiku no sosiál ne’ebé grave. Povu simu rezultadu ho dame,” nia hatutan.
Virgilio Hornai husu, atu lideransa ne’e kontinua hodi garante demokrasia iha Timor-Leste buras ba beibeik.
Iha parte ketak Observadór Polítika, Antonio Magno konsidera avaliasaun ne’e loos, tanba estabilidade eleitorál sai indikadór importante ba maturidade demokrasia.
“Kuandu CNE imparsiál, partidu sira simu rezultadu. Ne’e kontribui boot ba dame. Lideransa Jose Belo hatudu ona katak CNE bele sai instituisaun ne’ebé ema hotu fiar,” dehan Antonio Magno.
Nia hatutan katak, presiza mantein padraun profesionalizmu ne’e iha eleisaun sira tuir mai, hodi evita polarizasaun polítika.
Entretantu, Akademista UNPAZ, Freserico da Costa, hatete lideransa CNE ne’ebé hakmatek ne’e rezulta hosi jestaun instituisionál ne’ebé forte, no la partisipa iha interese polítiku.
“CNE iha Jose Belo nia lideransa hatudu ona independénsia institusionál. Ne’e mak halo eleisaun la’o hakmatek no laiha akuzasaun boot hosi kompetidor sira,” dehan Freserico da Costa.
Frederico dehan, modelu lideransa hanesan ne’e tenke sai referénsia ba instituisaun estadu sira seluk, hodi harii konfiansa públiku.
(car)
