DILI, STLTIMORLESTE.com — Membru joven rezisténsia husu Prezidente Repúblika José Ramos-Horta atu halo konsultasaun antes fó kondekorasaun ba sidadaun sira.
Joven rezisténsia João Choke hato’o pedidu ne’e ba jornalista iha Palásiu Prezidensiál Nicolau Lobato, Bairo Pité, Sesta (09/10/2026), depois enkontru ho Prezidente Repúblika.
João Choke hatete, nia husu Prezidente Repúblika atu revé prosesu seleksaun no halo konsultasaun kona-ba sidadaun sira-ne’ebé naran tama iha lista kondekorasaun, liuliu ba Ordem Kolár.
Nia esplika katak, objetivu rekomendasaun ne’e mak atu asegura katak ema ne’ebé simu kondekorasaun merese duni, bazeia ba sira-nia kontribuisaun.
João Choke hatete, rekomendasaun ne’e bazeia ba diálogu ne’ebé hala’o fulan rua liubá, ho partisipasaun husi organizasaun rezisténsia, grupu arte marsiál, arte rituál, sosiedade sivíl, deputadu sira no reprezentante seluk.
Nia dehan, diálogu ne’e identifika nesesidade atu avalia fila-fali prosesu distribuisaun kondekorasaun, tanba iha preokupasaun kona-ba balansu no justisa iha hili ema ne’ebé merese simu.
“Tanba ne’e, ami aprezenta rekomendasaun lubuk ida ba Prezidente Repúblika, atu tetu no halo konsultasaun fali, hodi identifika ho loloos ema sira-ne’ebé merese simu Ordem Kolár,” dehan João Choke.
Nia aumenta katak, Prezidente Repúblika simu rekomendasaun sira-ne’e no prontu atu kontinua halo konsultasaun ho komisaun no reprezentante rezisténsia antes foti desizaun kona-ba distribuisaun medalla.
Aleinde ne’e, João Choke rekomenda atu organiza kondekorasaun tuir loron nasionál importante sira, hanesan 20 Maiu no 12 Novembru, konsidera área servisu no kontribuisaun ida-idak.
Nia fó ezemplu katak profisionál saúde sira bele simu kondekorasaun iha loron ne’ebé liga ho saúde, atu distingue sira-nia kontribuisaun husi kontribuisaun membru rezisténsia iha luta libertasaun nasionál.
João Choke konsidera rekomendasaun sira-ne’e importante atu evita polémika kona-ba prosesu fó kondekorasaun iha futuru.
Kona-ba joven sira ne’ebé partisipa iha luta rezisténsia, nia konsidera katak balu merese simu kondekorasaun, maibé prosesu hili ema seluk presiza avalia ho kuidadu.
Nia mós hato’o preokupasaun katak proposta kondekorasaun balu bele hetan influénsia husi relasaun pesoál, hanesan amizade, kolega ka membru grupu, ne’ebé bele hamosu dúvida kona-ba kritériu seleksaun.
Maski nune’e, João Choke apresia disponibilidade Prezidente Repúblika atu rona rekomendasaun no hanoin husi membru rezisténsia, ho objetivu atu hadi’a prosesu kondekorasaun iha futuru.
(eme)
