DILI, STLTIMORLESTE.com — JSMP ezije Prezidente Tribunal Rekursu atu ativa fali KSMJ hodi rezolve reklamasaun kona-ba transferénsia juízes.
Peskijadór Sénior JSMP, Luís De Oliveira Sampaio, dehan KSMJ nia falta funsionamentu impede prosesu tratamentu reklamasaun sira ne’ebé hato’o hosi parte interesada.
“Desizaun KSMJ ne’ebé hetan kontestasaun tama iha kategoria disputa, tanba ne’e, mekanizmu reklamasaun tenke funsiona atu rezolve kestaun hirak-ne’e,” De Oliveira Sampaio dehan.
Nia hato’o deklarasaun ne’e ba jornalista sira iha Tribunál Dili, kuarta-feira (14/10).
De Oliveira Sampaio esplika katak KSMJ tenke analiza reklamasaun sira molok desizaun ne’ebé hetan kontestasaun kontinua ba ezekusaun, tuir prosedimentu ne’ebé aplika.
Nia konsidera katak falta konvokasaun ba membru KSMJ atu hala’o reuniaun hodi trata reklamasaun sira sai obstákulu ba prosesu rezolusaun.
Tuir nia, Prezidente Repúblika nomeia ona membru atu substitui membru ne’ebé iha impedimentu, no Governu mós nomeia ona membru atu kompleta korum.
Maski nune’e, nia afirma katak mekanizmu ne’e seidauk funsiona atu trata reklamasaun sira ne’ebé hato’o.
JSMP ezije Prezidente Tribunal Rekursu, ne’ebé lidera KSMJ, atu konvoka membru sira iha tempu badak hodi analiza no rezolve reklamasaun pendente.
Nia mós husu Prezidente Repúblika atu hala’o papél konstitusionál hodi asegura funsionamentu regulár instituisaun demokrátika, tuir Artigu 74 Konstituisaun Repúblika Demokrátika Timor-Leste.
Alende ne’e, De Oliveira Sampaio hatete katak Primeiru Ministru simu ona karta hosi juízes balu ne’ebé aprezenta alegasaun kona-ba situasaun ne’e.
Nia husu Primeiru-Ministru atu analiza dokumentu sira ne’e no konsidera medida ne’ebé bele foti iha nia kapasidade polítika.
Peskijadór Sénior JSMP ne’e mós subliña katak durante prosesu reklamasaun no rekursu kontensiozu, la bele konsidera automaticamente katak desizaun ida sai definitiva, bainhira disputa seidauk rezolve.
Nia esplika katak, reklamasaun no rekursu kontensiozu mak mekanizmu importante atu asegura parte interesada sira hetan oportunidade atu kontesta desizaun ne’ebé konsidera la loos.
De Oliveira Sampaio afirma katak membru KSMJ kompletu ona, inklui Juíza Natércia ne’ebé reativa fali nia funsaun, no membru sira ne’ebé nomeia hosi Prezidente Repúblika no Governu.
Tanba ne’e, nia husu lideransa KSMJ atu hatudu vontade no asumi responsabilidade hodi rezolve problema sira ne’ebé afeta prosesu administrasaun justisa.
JSMP afirma katak to’o agora, reklamasaun oioin ne’ebé hato’o ba KSMJ seidauk hetan solusaun, no tanba ne’e, husu atu mekanizmu ne’e hahú funsiona lalais.
Akademiku Universidade Nasionál Timor Lorosa’e (UNTL), Sebastião Dos Santos, husu KSMJ atu funsiona ho di’ak hodi foti desizaun tuir lei.
“Hau hanoin importante KSMJ tenke funsiona ho di’ak, atu foti desizaun ne’ebé tuir lei haruka,” dehan Sebastião Dos Santos.
Nia hatutan katak, desizaun KSMJ tenke bazeia ba lei atu evita prejudika juízes sira nia servisu iha sistema judisiáriu.
Tuir nia, desizaun kona-ba juízes nia pozisaun no fatin servisu tenke klaru, atu sira bele hala’o knaar ho di’ak iha tribunál.
(ter)
