DÍLI, STLTIMORLESTE.com – Juís estajiáriu na’in-12 sei simu posse iha tempu badak, depois CSMJ aprova homologasaun atu reforsa tribunál sira iha Timor-Leste.
Prezidente Tribunál Rekursu (TR), Afonso Carmona informa katak, juís estajiáriu na’in-12 ne’ebé remata ona formasaun tinan tolu iha Sentru Formasaun Jurídika no Judisiária (CFJJ) sei simu posse iha tempu badak.
Afonso Carmona fó informasaun ne’e ba jornalista sira iha Tribunal Rekursu, 22/10/2026 depois reuniaun kona-ba prosesu homologasaun ba pozisaun juís estajiáriu sira.
“Ita reuniaun tiha mak ita omologa sira-nia pozisaun hodi halo tomada de posse ba juís estajiáriu sira,” Afonso Carmona dehan.
Juís estajiáriu na’in-12 ne’e hein kleur ona atu hetan estatutu ofisiál. Prosesu homologasaun no tomada de posse sai importante atu fó klaridade kona-ba sira-nia pozisaun no permite sira hahú hala’o knaar judisiáriu.
Carmona hein katak nomeasaun no entrada iha funsaun ba juís foun sira bele ajuda tribunál sira prosesa kazu pendente no hadi’a efisiénsia servisu judisiáriu.
Falta juís iha tribunál sira sai dezafiu ba prosesamentu kazu sira. Ho juís foun na’in-12 ne’e, sistema judisiáriu espera bele hetan reforsu iha kapasidade atu atende kazu sira.
Maski nune’e, prosesu homologasaun no tomada de posse sei sai etapa importante atu formaliza estatutu juís estajiáriu sira antes sira hahú hala’o knaar ofisiál.
Reforma judisiária no formalizasaun estatutu juís sira presiza koordenasaun entre instituisaun relevante atu garante sistema justisa funsiona ho di’ak no responde ba nesesidade sidadaun sira.
Akademiku Universidade Nasionál Timor Lorosa’e (UNTL), Sebastião dos Santos, konsidera katak juís estajiáriu na’in-12 ne’ebé sei simu posse bele reforsa servisu tribunál, liuliu atu hamenus kazu pendente sira.
“Sira sei apoiu servisu tribunál nian, liuliu hamenus kazu pendente sira ne’ebé iha,” Sebastião dos Santos dehan.
Nia esplika katak, kazu barak kontinua tama iha tribunál, tanba ne’e presiza juís tan atu analiza no julga prosesu sira ne’e, hodi hamenus kazu pendente.
Bazeia ba observasaun STL nian iha tribunál, juís estajiáriu balu agora daudaun hala’o hela estájiu iha tribunál sira.
Durante períodu estájiu, juís estajiáriu sira trata prosesu individuál no sai adjuntu iha julgamentu kazu kolektivu, hodi aumenta sira-nia esperiénsia prátika iha área judisiária.
(ter)
