DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (17/07/2026) halao julgamentu ba arguidu ho inisial IX, tanba komete krime hasoru lezada inisial IdSAS.
Iha indisus katak, iha loron 11 fulan Agostu tinan 2024, maizumenus tuku 24:00 (meia-noite), iha uma iha Aldeia Moris Foun, Suku Madohi, Postu Administrativu Dom Aleixo, iha Munisipiu Dili, vitima IdSAS koalia ho arguidu IX, hodi deklara katak nia hakarak lori sira nia oan feto ba halimar ho vizinhu, familia vitima, iha Bidau, Akadiru-Hun.
Maibe, arguidu la permite, hodi hamosu diskusaun. Arguidu sai hirus no basa nia dala rua iha kotuk laran. Tuir mai nia haruka lezada sai husi uma. Tanba nee, lezada halibur nia saku no roupa no sai husi uma iha Suku Bidau Akadiru-hun.
Iha loron 16 Setembru 2024, tuku 10:00 dader, lezada ba iha arguidu nia uma iha Beduku. Bainhira too iha neeba, arguidu duni sai lezada no la permite sira nia oan feto, Feby hela ho lezada tanba nia oan feto sei menoridade. Nunee lezada iha intensaun atu tau matan no fo atensaun ba nia oan feto, maibe arguidu obriga nia oan feto halai no nia agora hela ho arguidu nia inan aman iha Quelicai, Baucau no agora arguidu hela iha Dili.
Arguidu komete hahalok sira neebe deskreve, neebe nia hatene katak lei bandu, atua ho livre, deliberadamente, no ho konsiensia, la ho tauk ba hahalok hanesan nee. Nia alegadamente prejudika vitima IdSAS iha nia integridade fizku, hodi hamosu nia kanek no bubu, no abuzu fiziku ka psikolojiku, neebe efetivamente akontese.
Aleinde nee, nia hatene katak ninia hahalok nee bandu no bele hetan kastigu tuir lei nuudar krime.
Arguidu IX nuudar autor no iha formuariu kompletu, komete krime maus tratu ba konjuje (hasoru vitima, IdSAS , punivel tuir artigu 154 husi Kodigu Penal no konjuga ho artigu 3º, pontu d) no 35.º, letra b), hasoru Lei No. Domestika, violensia domestika. 7/2010.
Hatan ba akuzasau nee arguidu deklara, faktus sira nee balun loos no balun sala, tanba iha momentu nee kalan arguidu ho lezada istoria malu, tanba arguidu la hatan lori labarik, tanba antes nee labarik tanis.
Arguidu dudu lezada dala rua no problema nee tanba labarik tanis iha kalan boot, maibe arguidu lakohi hader, no iha dader lezada hader tarde hodi halo sasoro nunee mosu problema.
Arguidu esplika, bainhira mosu poblema lezada halai ba nia familia sira, no ikus arguidu fo sala fali ba lezada ho osan US$ 100 mak agora kontinua moris hamutuk.
Lezada hateten, problema nee mosu tanba sira nain rua diskute malu mak nia tuku dala rua iha parte kotuk too monu ba rai, no baku tiha mak lezada ba nia familia sira iha area Bidau Akadiru Hun.
Iha audensia Julgamentu nee Ministeriu Publiku deklara katak, faktus sira neebe mak Ministeriu Publiku akuza ba arguidu nee balun provadu no balun la aprovadu, tanba nee husu Tribunal atu aplika Justisa ba arguidu.
No parte Defeza deklara katak, la iha faktu neebe provadu atu akuza ba arguidu, tanba nee husu Tribunal atu absolve arguidu husi krime, maibe bainhira Tribunal haree katak provadu bele aplika pena neebe mak adekuadu no justu ba povu.
Rona tiha alegasaun, adia ba loron seluk hodi rona desizaun.
Iha audensia Julgamentu nee prezide husi Juiz Koletivu, Estajiaria nainnra, Argentino Nunes, Ministeriu Publiku reprezenta Prokurador, Aderito Tillman, no arguidu hetan asistensia legal husi Defensor Publiku nain ida.
(ter)
