DILI, STLTIMORLESTE.com — Kablaki manan ADR União 3–0 iha semifinal Liga Voleibol Timor-Leste Segunda Divizaun 2026, hodi hakat ba final.
Partida ne’e hala’o iha Ginásio Dili, Kinta (24/09/2026), ho ekipa rua hatudu kapasidade liuhusi servis, passing, smesh no blok.
Iha set dahuluk, Kablaki domina partida no manan ADR União ho rezultadu 25–11.
Iha set daruak, ADR União aumenta rezisténsia no rekolha pontu barak, maibé Kablaki nafatin konsistente no manan 26–24.
Ho vantajen 2–0, Kablaki tama set datoluk ho determinasaun atu remata partida.
ADR União buka oportunidade atu hamenus diferensa, maibé Kablaki kontinua domina bola no manan set datoluk 25–17.
Rezultadu 3–0 ne’e asegura Kablaki nia vaga ba final Liga Voleibol Timor-Leste Segunda Divizaun 2026.
Iha final, Kablaki sei hasoru Choque, ne’ebé mos konsege avansa ba faze ikus kompetisaun.
Durante partida, apoiantes no simpatizantes sira fó animasaun ba jogadora sira, hodi halo ambiente iha Ginásio Dili sai animadu.
(leo)
